საქართველოს მთავრობასა და გაერო-ს შორის 2026-2030 წლების გაერო-ს მდგრადი განვითარების თანამშრომლობის ხელშეკრულება გაფორმდა

დღეს საქართველოს მთავრობასა და გაეროს შორის 2026-2030 წლების გაეროს მდგრადი განვითარების თანამშრომლობის ხელშეკრულებას მოეწერა ხელი. ხელშეკრულება განსაზღვრავს საქართველოს მთავრობასა და  გაეროს შორის სტრატეგიულ პარტნიორობას  მომდევნო ხუთი წლის განმავლობაში, რომლის მიზანია  მდგრადი განვითარების ხელშეწყობა საქართველოში.

ხელშეკრულებას, საქართველოს სახელით ხელი მოაწერა საქართველოს პრემიერ-მინისტრმა,ირაკლი კობახიძემ, ხოლო გაეროს სააგენტოთა ჯგუფის სახელით, გაეროს მუდმივმა კოორდინატორმა საქართველოში, დიდიე ტღებიუკმა. 

ხელშეკრულების ხელმოწერის ცერემონიაზე სიტყვით გამოსვლისას პრემიერ-მინისტრმა, ირაკლი კობახიძემ, ხაზი გაუსვა 5-წლიანი თანამშრომლობის ხელშეკრულების  მნიშვნელობას, რომელიც ერთი მხრივ, ეროვნულ პრიორიტეტებს ეფუძნება, ხოლო, მეორე მხრივ, გაეროს მდგრადი განვითარების მიზნების სულისკვეთებას ასახავს.

ირაკლი კობახიძემ ყურადღება გაამახვილა საქართველოსა და გაერთიანებული ერების ორგანიზაციის 30-წლიან თანამშრომლობაზე და აღნიშნა, რომ ერთობლივმა ძალისხმევამ მნიშვნელოვნად გააძლიერა ქვეყნის ინსტიტუციური შესაძლებლობები, ასევე ხელი შეუწყო კეთილდღეობის უზრუნველყოფას, რეფორმების მხარდაჭერას და მშვიდობის მშენებლობას.

ირაკლი კობახიძემ სიტყვით გამოსვლისას ასევე ისაუბრა საქართველოს მთავრობის ხედვაზე, რომელიც საშუალოვადიან პერსპექტივაში საქართველოს მაღალი შემოსავლის მქონე სახელმწიფოდ გარდაქმნას გულისხმობს. ირაკლი კობახიძემ ხაზი გაუსვა გაეროსთან გაფორმებული 5-წლიანი თანამშრომლობის ხელშეკრულების  როლს საქართველოს მთავრობის ამბიციური დღის წესრიგის აღსრულების პროცესში და გაეროს გუნდს თანამშრომლობისთვის მადლობა გადაუხადა.

„მადლობას ვუხდი გაეროს გუნდს, რომელმაც საქართველოს ხელისუფლებასთან მჭიდრო დიალოგის შედეგად, ხედვა ეროვნულ პრიორიტეტებს მაქსიმალურად დაუახლოვა. შერჩეული მიმართულებები ეხმიანება ჩვენს მისწრაფებებს, შევამციროთ ურბანულ დასახლებებსა და რეგიონებს შორის არსებული უთანასწორობა, მნიშვნელოვნად წავახალისოთ დეცენტრალიზებული მმართველობა, გავაძლიეროთ ადამიანის უფლებათა დაცვის სტანდარტები, ხელი შევუწყოთ ყოვლისმომცველი სოციალური დაცვისა და განათლების სისტემების განვითარებას. ძალიან მნიშვნელოვანი იყოს ჩვენს ეროვნულ პრიორიტეტებთან ამ დოკუმენტის დაახლოება", - განაცხადა ირაკლი კობახიძემ.

ღონისძიების მონაწილეებს სიტყვით მიმართა საქართველოს მთავრობის ადმინისტრაციის უფროსმა ლევან ჟორჟოლიანმა. მისი შეფასებით, მდგრადი განვითარების თანამშრომლობის ხელშეკრულება სრულად ემყარება საქართველოს ეროვნულ ინტერესებს. 

,,აღნიშნული დოკუმენტი სრულად ემყარება საქართველოს ეროვნულ ინტერესებს. ყველა ის პროექტი, რომელიც განხორციელდება ამ ჩარჩო-დოკუმენტის თანახმად, იქნება საქართველოს ეროვნული ინტერესების შესაბამისი. მინდა, მადლობა გადავუხადო გაეროს გუნდს, სააგენტოებს, ასევე - სამინისტროებს აქტიური მონაწილეობისთვის. ვფიქრობთ, ეს იქნება შედეგზე ორიენტირებული პროცესი, რომელიც რეალურ შედეგებს მოუტანს ჩვენი ქვეყნის მოსახლეობას", - განაცხადა ლევან ჟორჟოლიანმა.

ღონისძიებაზე სიტყვით გამოვიდა გაეროს მუდმივი კოორდინატორი საქართველოში დიდიე ტღებიუკი. მისი შეფასებით, საქართველოსა და გაეროს შორის 30-წლიანი ღრმა პარტნიორობის ისტორიაში ახალი, მნიშვნელოვანი ეტაპი იწყება. მისი შეფასებით, თანამშრომლობის ხელშეკრულება წარმოადგენს საერთო ვალდებულებას  მდგრადი განვითარების მიზნების მიღწევის პროგრესის მხარდასაჭერად. 

„დღეს ახალი, მნიშვნელოვანი ეტაპია საქართველოსა და გაეროს შორის 30-წელზე მეტი ხნის გრძელვადიანი და ღრმა პარტნიორობის ისტორიაში,“ –  განაცხადა დიდიე ტღებუკმა, გაეროს მუდმივმა კოორდინატორმა საქართველოში. „თანამშრომლობის ხელშეკრულება წარმოადგენს პირობას, რომელსაც ჩვენ ვიზიარებთ საქართველოს მთავრობასა და ყველა პარტნიორთან - განვახორციელოთ გადამწყვეტი რეფორმები მდგრადი განვითარების მიზნების მიღწევისკენ პროგრესის დასაჩქარებლად, რადგან მხოლოდ 5 წელია დარჩენილი მდგრადი განვითარების მიზნების მისაღწევად. ეს ასევე წარმოადგენს ვალდებულებას, დავიცვათ საქართველოს საერთაშორისო ვალდებულებები, ადამიანის უფლების დაცვისა და კლიმატის ცვლილებასთან  ბრძოლის კუთხით და მისი მიზანია, მწვანე და ინკლუზიური განვითარების ხელშეწყობა საქართველოში მყოფ ადამიანებს შორის უთანასწორობის შესამცირებლად, განსაკუთრებით კი ურბანულ დასახლებებსა და რეგიონებს  შორის. თანამშრომლობის ეს ხელშეკრულება სთავაზობს ყველას - მოქმედების პლატფორმას ერთად მუშაობისთვის,"- განაცხადა გაეროს მუდმივმა კოორდინატორმა საქართველოში.

დიდიე ტღებიუკმა მადლობა გადაუხადა საქართველოს მთავრობის ადმინისტრაციას და დარგობრივ სამინისტროებს ხელშეკრულების შემუშავების პროცესში მჭიდრო თანამშრომლობისთვის.

„მოუთმენლად ველი მდგრადი განვითარების ახალი ხელშეკრულების წარმატებით განხორციელებას მომდევნო 5 წლის განმავლობაში. ის დაფუძნებული იქნება მრავალმხრივი კოორდინირებული ურთიერთობის, სოლიდარობისა და საერთო პასუხისმგებლობის პოტენციალის გამოყენებაზე. მსურს, მივმართო ქართველ ხალხს - მათ შეუძლიათ, გაეროს იმედი ჰქონდეთ,"- განაცხადა დიდიე ტღებიუკმა.

ხელშეკრულების შემუშავებას წინ უძღოდა ფართო განხილვა, რომელშიც მონაწილეობდნენ საქართველოს მთავრობა, საერთაშორისო პარტნიორები, გაეროს სააგენტოები, აკადემიური წრეები, ახალგაზრდობა, სამოქალაქო  საზოგადოება და კერძო სექტორი.

თანამშრომლობის ხელშეკრულება ეფუძნება გაეროს პრინციპს „არავინ დარჩეს განვითარების პროცესებს მიღმა“ და ადამიანის უფლებებზე დაფუძნებულ მიდგომას.

ხელშეკრულების ფარგლებში, გაეროს 21 რეზიდენტი და არარეზიდენტი სააგენტო, ფონდი და პროგრამა გააგრძელებს საქართველოს მხარდაჭერას ოთხი პრიორიტეტული მიმართულებით:

• ინკლუზიური ეკონომიკური ზრდისა და მწვანე ტრანზიციის ხელშეწყობა
• განათლების, ჯანდაცვისა და სოციალური დაცვის გაძლიერება
• მმართველობა, ადამიანის უფლებები და სოციალური ერთობა
• მშვიდობისა და მედეგობის განმტკიცება გამყოფი ხაზის ორივე მხარეს.

გაეროს სისტემა საქართველოში ამ მიზნებს მიაღწევს ერთობლივი პროგრამების, ინოვაციური საპილოტე პროექტების, ინტეგრირებული პოლიტიკის სარეკომენდაციო მხარდაჭერის, ინოვაციური დაფინანსების მექანიზმებისა  და ეროვნულ და საერთაშორისო პარტნიორებთან თანამშრომლობის მეშვეობით.

თანამშრომლობის ხელშეკრულება კრიტიკულ და გამოწვევებით აღსავსე მომენტში გაფორმდა, როდესაც მდგრადი განვითარების მიზნების მისაღწევად მხოლოდ ხუთი წელია დარჩენილი. ახალი ხელშეკრულება მნიშვნელოვნად  დააჩქარებს პროგრესს მდგრადი განვითარების მიზნებისა და ქვეყნის განვითარების პრიორიტეტების მიღწევისკენ.

ხელშეკრულების ხელმოწერის ცერემონიას დაესწრნენ საქართველოს მთავრობის წევრები, გაეროს სააგენტოების ჯგუფის, საქართველოში აკრედიტებული დიპლომატიური კორპუსის, სამოქალაქო საზოგადოებისა და კერძო  სექტორის წარმომადგენლები.