ჩვენი გუნდი საქართველოში

იზაბელა კასტროჯოვანი გაეროს ბავშვთა ფონდის წარმომადგენელია საქართველოში. იზაბელას აქვს საერთაშორისო განვითარებისა და ჰუმანიტარული საქმიანობის 25-წლიანი გამოცდილება აღმოსავლეთ აფრიკაში, აზიაში, ბალკანეთის ქვეყნებსა და ახლო აღმოსავლეთში, სადაც ხელმძღვანელობდა პროგრამებს, პოლიტიკასა და ადვოკატირების ძალისხმევას ბავშვთა უფლებების ხელშეწყობის მიზნით.

იზაბელა კასტროჯოვანი იტალიის მოქალაქეა და ფლობს ფლორენციის უნივერსიტეტის მაგისტრის ხარისხს პოლიტიკურ მეცნიერებებსა და საერთაშორისო ურთიერთობებში, ასევე ლონდონის უნივერსიტეტის აღმოსავლური და აფრიკული კვლევების სკოლის მაგისტრის ხარისხს საერთაშორისო და შედარებით სამართალში.

2026 წლის 14 სექტემბრიდან ბატონი ჟოაო ბრედა ოფიციალურად შეუდგა საქართველოში ჯანმრთელობის მსოფლიო ორგანიზაციის ოფისის წარმომადგენლის მოვალეობის შესრულებას.
საქართველოში ჩამოსვლამდე, ბ-ნი ბრედა WHO-ს სპეციალური წარმომადგენელი იყო საბერძნეთში და ხელმძღვანელობდა ათენში განთავსებულ ჯანმოს ევროპის ხარისხიანი სამედიცინო მომსახურებისა და პაციენტის უსაფრთხოების (QoC) ოფისს.

ბ-ნი ბრედა პორტუგალიის მოქალაქეა და ფლობს დოქტორის ხარისხს ნუტრიციოლოგიაში, მაგისტრის ხარისხს საზოგადოებრივ ჯანდაცვაში და ბიზნესის ადმინისტრირების მაგისტრის ხარისხს. მას WHO-ში მუშაობის 15 წელზე მეტი გამოცდილება აქვს, სხვადასხვა ხელმძღვანელ თანამდებობებზე, მათ შორის კოპენჰაგენი (2010–2017), მოსკოვი (2017–2021), და ათენი (2021–2026). მანვე დააფუძნა ათენის საუკეთესო პრაქტიკის ცენტრი (Athens Centre of Excellence), რომელიც ორიენტირებულია სამედიცინო მომსახურების ხარისხისა და პაციენტის უსაფრთხოების გაუმჯობესებაზე, უთანასწორობის შემცირებაზე, აგრეთვე ჯანდაცვის სფეროში ინოვაციებისა და ლიდერობის ხელშეწყობაზე.

ამას გარდა, WHO ევროპის რეგიონულ ოფისში კვების, ფიზიკური აქტივობისა და სიმსუქნის პროგრამის ხელმძღვანელის რანგში, ბ-ნი ბრედა უძღვებოდა სურსათისა და კვების სამოქმედო გეგმებისა და ფიზიკური აქტივობის სტრატეგიების შემუშავების, დანერგვისა და შეფასების სამუშაოებს. იგი ასევე ხელმძღვანელობდა WHO არაგადამდებ დაავადებათა პრევენციისა და კონტროლის ევროპულ ოფისს, რომელიც თავად დააფუძნა და მნიშვნელოვან რეგიონულ ინიციატივად ჩამოაყალიბა.

ჟოაო ბრედა WHO ევროპის საზოგადოებრივი ჯანდაცვის ლიდერობის კურსის ხუთივე გამოშვების თანადირექტორია და WHO სამედიცინო მომსახურების ხარისხისა და პაციენტის უსაფრთხოების ევროპული საშემოდგომო სკოლის შექმნას ხელმძღვანელობდა. გარდა ამისა, იგი WHO ევროპის რეგიონული ოფისის თანამშრომელთა ასოციაციის (EURSA) ყოფილი პრეზიდენტია.

მის წვლილს საზოგადოებრივი ჯანდაცვისა და ჯანდაცვის ლიდერობის სფეროში ფართო აღიარება ხვდა წილად. პორტუგალიის ჯანდაცვის სამინისტრომ იგი ჯანდაცვის სფეროში განსაკუთრებული დამსახურებისთვის ოქროს მედლით დააჯილდოვა, ხოლო WHO-მ ორჯერ მიანიჭა საუკეთესო გუნდის ჯილდო (Awards of Excellence). იგი 20-ზე მეტი სამეცნიერო და აკადემიური ჯილდოს მფლობელია.

ბ-ნ ბრედას, როგორც მკვლევარს, 400-ზე მეტი აკადემიური სტატია და ანგარიში, აგრეთვე 20-ზე მეტი წიგნი აქვს გამოქვეყნებული.

ანნა რიჩი არის გაეროს ლტოლვილთა უმაღლესი კომისარიატის (UNHCR) წარმომადგენელი საქართველოში. საქართველოში დანიშვნამდე მსახურობდა UNHCR-ის წარმომადგენლად ხორვატიაში. ქალბატონ რიჩს აქვს ოც წელზე მეტი გამოცდილება დაცვის, ადვოკატირების, ჰუმანიტარული კოორდინაციის, პოლიტიკისა და განვითარების სფეროებში. იგი მუშაობდა UNHCR-ში როგორც სათაო ოფისში, ასევე საველე ოპერაციებში აფრიკასა და ევროპაში, თავშესაფრის მაძიებლებთან, ლტოლვილებთან, დაბრუნებულებთან, მოქალაქეობის არმქონე პირებთან და იძულებით გადაადგილებულ პირებთან. UNHCR-ში მუშაობამდე ქალბატონი რიჩი მუშაობდა დავების ალტერნატიული გადაწყვეტის სფეროში ჰააგის მუდმივ საარბიტრაჟო სასამართლოში ნიდერლანდებში, ასევე ავსტრალიაში. ქალბატონი რიჩი არის ავსტრალიის მოქალაქე. მას მიღებული აქვს იურიდიული განათლება ავსტრალიაში, მელბურნის უნივერსიტეტში და მაგისტრის ხარისხი საჯარო საერთაშორისო სამართალში ნიდერლანდებში, ლეიდენის უნივერსიტეტში.

დაგლას უები განვითარების გამორჩეული პროფესიონალია გაერთიანებული ერების ორგანიზაციაში ოცწლიანი მოღვაწეობის გამოცდილებით. მისი საქმიანობის ძირითადი სფეროები ადამიანის ჯანმრთელობა და გარემოსდაცვითი მდგრადობაა. 2023 წლის ოქტომბერში, დაგლას უები დაინიშნა გაეროს განვითარების პროგრამის მუდმივი წარმომადგენელი საქართველოში. მანამდე, იგი მუშაობდა UNDP-ის ჯანმრთელობისა და გარემოს დაცვის გლობალური მრჩეველის თანამდებობაზე და ბაზირებული იყო იორდანიაში. 2020 წელს, COVID-19 პანდემიის პერიოდში, დაგლას უები კოორდინირებას უწევდა UNDP-ის ერთიან რეაგირებას ამ გლობალურ გამოწვევაზე. დაგლას უებს აქვს გაეროს სხვადასხვა სააგენტოსთან, მათ შორის გაეროს ბავშვთა ფონდთან თანამშრომლობის გამოცდილება. მისი პროფესიული საქმიანობა მოიცავდა ეპიდემიებზე რეაგირების მართვასა და ჯანმრთელობის სოციალური ფაქტორების კვლევას ცვალებადი გარემოს კონტექსტში. საქართველოში დანიშვნამდე, დაგლას უები მუშაობდა ისეთ ქვეყნებში, როგორიცაა ზამბია, კენია, ეთიოპია, მოზამბიკი, განა, სენეგალი, იორდანია და სამხრეთ აფრიკა. იგი ასევე მოღვაწეობდა და სუბსაჰარის აფრიკისა და სამხრეთ-აღმოსავლეთ აზიის რეგიონებში. დუგლას უები ფლობს ფილოსოფიის დოქტორის ხარისხს ლონდონის უნივერსიტეტიდან. ამჟამად, იგი თანამშრომლობს ნიუ-იორკის უნივერსიტეტის გლობალური საზოგადოებრივი ჯანმრთელობის სკოლასთან მოწვეული პროფესორის სტატუსით. დაგლას უები წარმატებული მკვლევარი და ავტორია, რომელსაც გამოქვეყნებული აქვს 50-ზე მეტი მეცნიერული სტატია.

დმიტრი მარიასინი დაინიშნა გაეროს ევროპის ეკონომიკური კომისიის (UNECE) აღმასრულებელი მდივნის მოადგილედ 2021 წლის 1 მარტს.
UNECE-ში გადასვლამდე იგი იყო გაეროს განვითარების პროგრამის (UNDP) მუდმივი წარმომადგენელი სომხეთში (2018 წლის დეკემბრიდან; მანამდე 2017–2018 წლებში იყო მუდმივი წარმომადგენლის მოადგილე). 2011–2016 წლებში მუშაობდა UNDP-ის საგარეო ურთიერთობებისა და ადვოკატირების ბიუროში რეგიონული პარტნიორობის მრჩევლად და გუნდის ხელმძღვანელად, ევროპისა და დსთ-ის რეგიონზე პასუხისმგებლობით (სტამბული). ამ პოზიციაზე იგი ხელმძღვანელობდა 20-კაციან გუნდს, რომელიც ხელს უწყობდა UNDP-ის პარტნიორობებს ახალ განვითარების დონორებთან, მათ შორის სტრატეგიულ თანამშრომლობას ჩეხეთთან, ყაზახეთთან, რუმინეთთან, რუსეთთან და სლოვაკეთთან. მანამდე მუშაობდა UNDP-ის რეგიონულ მხარდაჭერის ცენტრში ბრატისლავაში, UNDP-ის სათაო ოფისში ნიუ-იორკში და UNDP-ის ოფისში მოსკოვში.
იგი ფლობს ეკონომიკის დოქტორის ხარისხს მოსკოვის სახელმწიფო უნივერსიტეტიდან, საჯარო ადმინისტრირების მაგისტრის ხარისხს ნიუ-იორკის უნივერსიტეტიდან (Robert F. Wagner Graduate School of Public Service) და დიპლომებს საჯარო ადმინისტრირებასა და საერთაშორისო ეკონომიკაში.

დოვ ლინჩი, რომელიც მუშაობს პარიზში, არის გაეროს განათლების, მეცნიერებისა და კულტურის ორგანიზაციის (UNESCO) საგარეო ურთიერთობების დირექტორი. 2010 წლიდან იგი მუშაობდა UNESCO-ს გენერალური დირექტორის კაბინეტში. კარიერა დაიწყო ლონდონის King’s College-ში ომის კვლევების ლექტორად. მანამდე მუშაობდა ეუთოს გენერალური მდივნის კაბინეტში უფროს მრჩევლად და ევროკავშირის უსაფრთხოების კვლევების ინსტიტუტში, სადაც მისი საქმიანობა ძირითადად კონფლიქტების მოგვარებისა და second-track diplomacy-ის გამოყენებას ეხებოდა.
მან განათლება მიიღო იელისა და ოქსფორდის უნივერსიტეტებში და ფლობს საერთაშორისო ურთიერთობების დოქტორის ხარისხს ოქსფორდის უნივერსიტეტიდან (1995–1997).

ელენე ალადაშვილს აქვს 20 წელზე მეტი მუშაობის გამოცდილება სხვადახვა პოზიციებზე გაეროს სისტემაში, საერთაშორისო ორგანიზაციებსა და არასამთავრობო სექტორში. ის ხელმძღვანელობდა განვითარების პროექტებსა და სტრატეგიული კომუნიკაციის ინიციატივებს როგორც საქართველოში, ისე ამერიკის შეერთებულ შტატებში.

ელენე გაეროს პროექტების მომსახურების ოფისს (UNOPS) 2019 წელს შეუერთდა და ამჟამად საქართველოს ოფისის ხელმძღვანელის მოვალეობას ასრულებს. მანამდე ის იყო განვითარების და კომუნიკაციების დირექტორი სან-დიეგოს სახელმწიფო უნივერსიტეტის პროგრამაში საქართველოში, რომელიც ათასწლეულის გამოწვევის კორპორაციის (MCC) მიერ იყო დაფინანსებული.

მის პროფესიულ გამოცდილებაში ასევე შედის პროექტებისა და სტრატეგიული კომუნიკაციის მართვა გაეროს განვითარების პროგრამაში (UNDP), IREX-ში, Media Diversity Institute-ში და სხვა საერთაშორისო ორგანიზაციებში. ის ასევე თანამშრომლობდა საქართველოს პარლამენტთან, სახელმწიფო მინისტრის აპარატთან ევროკავშირში ინტეგრაციის საკითხებში და გენდერული თანასწორობის საბჭოსთან, სადაც ხელმძღვანელობდა სტრატეგიული კომუნიკაციისა და დაინტერესებულ მხარეებთან ურთიერთობის ჩარჩოების შემუშავებას.

ელენე ფლობს პოლიტიკურ მეცნიერებათა მაგისტრის ხარისხს ცენტრალური ევროპის უნივერსიტეტიდან და საერთაშორისო ურთიერთობების ბაკალავრის ხარისხს თბილისის სახელმწიფო უნივერსიტეტიდან. მან ასევე შეისწავლა მენეჯმენტი ლეჰაის უნივერსიტეტში და არის აშშ-ის სახელმწიფო დეპარტამენტის მომავალ ლიდერთა გაცვლითი პროგრამისა (FLEX) და Global Village პროგრამის კურსდამთავრებული.

ენდრიუ ჯუველი საერთაშორისო სავალუტო ფონდს 2010 წელს შეუერთდა. საქართველოში გადმოსვლამდე ენდრიუ ჯუველი ბოსნია და ჰერცეგოვინაში IMF-ის წარმომადგენელი იყო. ჯუველი ასევე გახლდათ ფონდის ევროპული დეპარტამენტის უფროსი ეკონომისტი. IMF-ში დასაქმებამდე, ჯუველი 10 წლის განმავლობაში ამერიკის შეერთებული შტატების ფინანსური დეპარტამენტის ეკონომისტიც იყო.

დოქტორი ერფან ალი არის რეგიონული და ურბანული დაგეგმვის სფეროს გამოცდილი პროფესიონალი. 2023 წლის თებერვლიდან იგი ასრულებს გაერო-ს ადამიანის დასახლებების პროგრამის ( UN-Habitat) აპარატის უფროსისა და რეგიონული პროგრამების განყოფილების დირექტორის მოვალეობას. მანამდე მას ეკავა არაბული ქვეყნების რეგიონული წარმომადგენლისა და ადამიანთა დასახლებების უფროსი ოფიცრის პოზიციები. იგი ასევე ხელმძღვანელობდა UN-Habitat-ის პროგრამას ერაყში და მუშაობდა რეგიონული და ურბანული დაგეგმვის სპეციალისტად.

მისი წინა გამოცდილება მოიცავს მუნიციპალური ადმინისტრაციის მოდერნიზაციის პროგრამის ხელმძღვანელობას, რომელიც მიზნად ისახავდა ქალაქების მართვის გაუმჯობესებას სირიაში, ასევე სირიის ადგილობრივი ადმინისტრაციის სამინისტროს სისტემებისა და გეგმების დირექტორის პოზიციას.

მას აქვს ურბანული დაგეგმვისა და სივრცის მოწყობის დოქტორის ხარისხი Université de Paris Est-Marne-la-Vallée-დან და პროექტების მართვის მაგისტრის ხარისხი დამასკოს უნივერსიტეტიდან.

დოქტორი შკოლნიკოვი აღნიშნულ თანამდებობას იკავებს 2011 წლის ივლისიდან. მანამდე მას ეკავა არაერთი თანამდებობა სამთავრობათაშორისო და არასამთავრობო ორგანიზაციებში, რომლებიც მუშაობდნენ ადამიანის უფლებებისა და კარგი მმართველობის საკითხებზე აღმოსავლეთ ევროპასა და ცენტრალურ აზიაში. იგი ასევე მუშაობდა უფროსი სამეცნიერო თანამშრომლის რანგში ჯეფერსონის ინსტიტუტში, მათ შორის ბელგრადის, სერბეთისა და ვაშინგტონის ოფისებში. ასევე მუშაობდა უნგრეთში Freedom House-ის ევროპული ოფისის დირექტორად, ეუთო/ოდირის მრჩევლად მიგრაციისა და გადაადგილების თავისუფლების საკითხებში, შემდეგ ხელმძღვანელობდა ეუთო/ოდირის დემოკრატიზაციის განყოფილებას პოლონეთში და მუდმივმოქმედი კონსულტანტი იყო RAND კორპორაციაში, შეერთებულ შტატებში.

2019 წლის 1 ნოემბერს ბატონი ტალგატ ტოლუბაევი (საფრანგეთიდან) დაინიშნა გაერთიანებული ერების ორგანიზაციის დანაშაულისა და მართლმსაჯულების რეგიონთაშორისი კვლევითი ინსტიტუტის ქბრბ რისკის შემცირებისა და უსაფრთხოების მართვის პროგრამის რეგიონალურ კოორდინატორად. იგი კოორდინაციას უწევს სამხრეთ-აღმოსავლეთისა და აღმოსავლეთ ევროპის რეგიონის 10 ქვეყნის საქმიანობას ევროკავშირის ქბრბ რისკების შემცირების მოწინავე გამოცდილების გაზიარების ინიციატივის ფარგლებში. აღნიშნული თანამდებობის დაკავებამდე იგი 16 წელზე მეტი ხნის განმავლობაში მუშაობდა საერთაშორისო კრიმინალური პოლიციის ორგანიზაციის (INTERPOL) შტაბში. დაამთავრა ბოსტონის უნივერსიტეტი სტრატეგიისა და უსაფრთხოების კვლევების სპეციალობით.

იაროსლავ პონდერი არის საერთაშორისო სატელეკომუნიკაციო კავშირის (ITU) ევროპის ოფისის ხელმძღვანელი (ჟენევა, შვეიცარია). ბოლო წლებში მან განახორციელა მრავალი პროექტი, აქტივობა და ინიციატივა ეროვნულ, რეგიონულ და საერთაშორისო დონეზე. იგი წამყვან როლს ასრულებდა მრავალ საერთაშორისო კონფერენციასა და სამიტში, რომლებიც მიმართულია საინფორმაციო და საკომუნიკაციო ტექნოლოგიების (ICT) ინოვაციის ხელშეწყობისკენ, ICT ეკოსისტემის განვითარებისა და ინფორმაციული საზოგადოების და ციფრული ეკონომიკის პროგრესისკენ გლობალურად. ამასთანავე, იგი მონაწილეობდა სტრატეგიების განსაზღვრასა და მათი დროული განხორციელების უზრუნველყოფაში. პროფესიული კარიერის განმავლობაში ბატონ პონდერს ეკავა მნიშვნელოვანი პოზიციები საჯარო სექტორსა და საკანონმდებლო პროექტებში, რომლებმაც გავლენა მოახდინეს საჯარო პოლიტიკის ფორმირებაზე.

2021 წლის აგვისტოდან კაორი იშიკავა საქართველოში გაეროს ქალთა ორგანიზაციის წარმომადგენელია. მას 20-ზე მეტ ქვეყანაში სამშვიდობო, ჰუმანიტარული და განვითარების პროგრამების მართვის, პოლიტიკის დონეზე ადვოკატირების 20 წელზე ხანგრძლივი, მრავალმხრივი გამოცდილება აქვს. საქართველოში ჩამოსვლამდე ქალბატონი იშიკავა გაეროს მოსახლეობის ფონდის მონღოლეთის ოფისს ხელმძღვანელობდა. მანამდე კი იგი გაეროს მოსახლეობის ფონდის სხვადასხვა ქვეყნის წარმომადგენლობებსა და განყოფილებებში მუშაობდა, მათ შორის ლაოსის სახალხო დემოკრატიულ რესპუბლიკაში, იემენში, ინდონეზიაში, ავღანეთსა და მიანმარში. იგი არაბულ სახელმწიფოებში გაეროს მოსახლეობის ფონდის (ASRO) კაიროს რეგიონულ ოფისში საქმიანობდა. ამას გარდა, ნიუ-იორკში, გაეროს მოსახლეობის ფონდის სათავო ოფისის ტექნიკური განყოფილების გენდერის, ადამიანის უფლებათა და კულტურის ფილიალის გენდერის სპეციალისტი იყო. გაეროს მოსახლეობის ფონდამდე კაორი იშიკავა გაეროს გარემოს დაცვის პროგრამასა (UNEP) და იაპონიის ორგანიზაცია ოჯახის დაგეგმვის საერთაშორისო თანამშრომლობისთვის, (JOICFP) იაპონიაში მუშაობდა. ქალბატონი იშიკავა იაპონელია. მას აქვს იაპონიის რიტსუმეიკანის უნივერსიტეტის ბაკალავრის ხარისხი სოციოლოგიაში, სოციალური უზრუნველყოფის პოლიტიკისა და მოსახლეობის დაბერების სპეციალიზაციით, ფლობს დიდი ბრიტანეთის აღმოსავლეთ ინგლისის უნივერსიტეტის განვითარების კვლევების დიპლომს, სოციალური კვლევების ინსტიტუტის მაგისტრის ხარისხს ქალი და განვითარების განხრით ნიდერლანდებში და ბრიტანეთის ვარვიკის ბიზნესის სკოლის მაგისტრის ხარისხს ბიზნესის ადმინისტრირებაში. კაორი იშიკავა დაქორწინებულია. მას ერთი ქალიშვილი ჰყავს.

კლერ ჰარასტი 25 წელზე მეტ გამოცდილებას ფლობს ეკონომიკური და სოციალური პოლიტიკის ანალიზისა და კონსულტაციის სფეროში, ასევე მთავრობებთან და სოციალურ პარტნიორებთან თანამშრომლობის, მათზე გავლენის მოხდენისა და მათთან ურთიერთობის მიმართულებით.

ის შეუერთდა შრომის საერთაშორისო ორგანიზაციას (ILO) 1998 წელს, სტრასბურგის უნივერსიტეტში საერთაშორისო ეკონომიკის სწავლების შემდეგ. 2023 წლის იანვრიდან იგი არის გენერალური დირექტორის თანაშემწის (მმართველობა, უფლებები და დიალოგი) უფროსი მრჩეველი, მანამდე კი ოთხი წლის განმავლობაში მუშაობდა პოლიტიკის საკითხებში გენერალური დირექტორის მოადგილის უფროს მრჩევლად, სადაც კოორდინაციას უწევდა ILO-ის ჩართულობას G20, G7 და BRICS ფორმატებში და თანამშრომლობას მსოფლიო ბანკთან და საერთაშორისო სავალუტო ფონდთან ეკონომიკურ და სოციალურ საკითხებზე.

2010-2018 წლებში იგი იყო დასაქმებისა და განვითარების პოლიტიკის უფროსი სპეციალისტი დასაქმების პოლიტიკის დეპარტამენტში. 2008-2010 წლებში ჰარასტიმ უხელფასო შვებულება აიღო, რათა ემუშავა მსოფლიო ბანკის ოფისში მალიში ეკონომისტად სიღარიბის საკითხებზე.

მას გამოქვეყნებული აქვს მრავალი სტატია და ანგარიში დასაქმების საკითხებზე, განსაკუთრებით სიღარიბის შემცირებასთან კავშირზე, განვითარებად ქვეყნებში ახალგაზრდებისთვის მიზნობრივ პოლიტიკასა და ასაკოვანი მუშაკების საკითხებზე. იგი ფლობს განვითარების კვლევების დოქტორის ხარისხს პარიზის École des Hautes Études en Sciences Sociales-იდან.

ლარს იოჰან ლოუნბეკის მოღვაწეობა IOM-ში 15 წელზე მეტ ხანს ითვლის. მას მრავალწლიანი გამოცდილება გააჩნია მიგრაციის პოლიტიკის შემუშავებასა და სტრატეგიის განხორციელების კუთხით განვითარებად, აგრეთვე საგანგებო და პოსტ-კრიზისულ სიტუაციებში, ევროპასა და აზიის წყნარი ოკეანის რეგიონში. საქართველოში ჩამოსვლამდე, ლარსი IOM მოლდოვის მისიის უფროსის თანამდებობას იკავებდა 2018 - 2024 წლებში, სადაც მნიშვნელოვანი როლი შეასრულა უკრაინელი ლტოლვილებისთვის ჰუმანიტარული დახმარებისა და მხარდაჭერის უზრუნველსაყოფად. მისი კარიერა ორგანიზაციაში ჟენევის შტაბ-ბინაში სამმართველოს უფროსისა და მიგრაციის პოლიტიკის უფროსი მრჩევლის თანამდებობაზე დაიწყო, მოგვიანებით იგი მუშაობდა მიგრაციისა და განვითარების საკითხებში მიგრაციის პოლიტიკის უფროს მრჩევლად IOM-ის აზიის წყნარი ოკეანის რეგიონულ ოფისში ბანგკოკში, ტაილანდი.
IOM-მდე, ლარსი სხვადასხვა თანამდებობაზე მუშაობდა შვედეთის საგარეო საქმეთა სამინისტროში, მათ შორის მრჩევლად ბრიუსელში შვედეთის მუდმივ წარმომადგენლობაში და ეროვნულ ექსპერტად ევროკომისიაში. მისი ადრეული კარიერა ასევე მოიცავს პოლიტიკური ოფიცერის პოზიციაზე გამოცდილებას სარაევოში დეიტონის სამშვიდობო შეთანხმების უმაღლესი წარმომადგენლის ოფისში და UNHCR-ში ჩრდილოეთ ერაყსა და რუსეთის ფედერაციაში. იგი ფლობს საერთაშორისო სამართალის მაგისტრის ხარისხს სტოკჰოლმის უნივერსიტეტიდან, შვედეთი.

ლიამ ჩიკა არის აზერბაიჯანის, საქართველოსა და თურქეთის გაეროს სოფლის მეურნეობის განვითარების საერთაშორისო ფონდის (IFAD) ქვეყნის დირექტორი და აღმოსავლეთ ევროპისა და ცენტრალური აზიის მრავალქვეყნიანი ოფისის ხელმძღვანელი, რომელიც სტამბოლში მდებარეობს. მან კარიერა დაიწყო კერძო სექტორში სადაზღვევო იურისტად და ზარალის შეფასების სპეციალისტად Lloyd’s of London-ში. 2005 წელს შეუერთდა სოფლის მეურნეობის განვითარების საერთაშორისო ფონდს (IFAD) იურიდიულ მრჩევლად. IFAD-ში მუშაობის პერიოდში ეკავა სხვადასხვა პოზიცია, მათ შორის იყო მმართველი ორგანოების ოფისისა და საველე მხარდაჭერის განყოფილების ხელმძღვანელი. მანამდე ასევე მუშაობდა ევროპის რეკონსტრუქციისა და განვითარების ბანკში (EBRD) ლონდონში იურიდიულ მრჩევლად და მოგვიანებით იყო IFAD-ის ორი პრეზიდენტის სპეციალური მრჩეველი.

მას აქვს სამართლის მაგისტრის ხარისხი University College Dublin-დან და არის კვალიფიციური იურისტი იტალიაში (Avvocato) და ინგლისსა და უელსში (Solicitor).

სურსათისა და სოფლის მეურნეობის ორგანიზაციაში საქართველოსთან ურთიერთობების პოზიციაზე სამწლიანი მუშაობის შემდეგ, 2004 წელს, როდესაც ორგანიზაციის წარმომადგენლობა საქართველოში გაიხსნა, ბატონი მესხი დაინიშნა ორგანიზაციის წარმომადგენლად. სურსათისა და სოფლის მეურნეობის ორგანიზაციაში სამსახურის დაწყებამდე, ბატონი მესხი 2000 წელს ხანმოკლე დროის განმავლობაში მუშაობდა საქართველოს სოფლის მეურნეობის სამინისტროში საერთაშორისო ურთიერთობათა დეპარტამენტის უფროსად. 1991 წლიდან 2000 წლამდე მუშაობდა კერძო სექტორში სოფლის მეურნეობისა და ენერგეტიკის სფეროებში, მათ შორის კომპანია „HANWHA Petroleum“-ის იმპორტისა და მარკეტინგის მენეჯერის თანამდებობაზე სეულში (კორეა),კომპანია „Gulf-Georgia“-ს მშრალი ტერიტორიების სასუქების კოორდინატორად შარჯაში (არაბთა გაერთიანებული საამიროები), სავაჭრო კონსულტანტად ბენღაზში (ლიბია) და მარკეტინგის კონსულტანტანტად კომპანია „Jason Co“-ში მოსკოვში (რუსეთის ფედერაცია) და ვოლვეგაში (ნიდერლანდები). 1986-91 წლებში იყო თბილისის არაბული ენის ლექტორი თბილისის სახელმწიფო უნივერსიტეტის სემიტური ენების განყოფილებაში. ბატონი მესხი ფლობს მაგისტრის ხარისხს ბიზნესის ადმინისტრირებაში, მაგისტრის ხარისხს საერთაშორისო ურთიერთობებში და ბაკალავრის ხარისხს ენათმეცნიერებაში.

გაეროს მოსახლეობის ფონდის (UNFPA) საქართველოს ოფისის ხელმძღვანელად დაინიშნა 2024 წლის მარტში. მისი საქმიანობა 12 წელზე მეტია უკავშირდება გაეროს მოსახლეობის ფონდის (UNFPA) საქართველოს ოფისს, სადაც ის 2012 წლიდან ხელმძღვანელობდა გენდერული თანასწორობის მიმართულებას და დიალოგს ადამიანის უფლებების შესახებ გაეროს, მთავრობასა და პარტნიორებს შორის. გაეროს მოსახლეობის ფონდის (UNFPA) საქმიანობაში ჩართვამდე, მარიამს, როგორც საერთაშორისო სამართლის იურისტს, 15 წლის განმავლობაში ეჭირა მენეჯერული პოზიციები კერძო და განვითარების სფეროებში. იგი ფლობს ჯორჯთაუნის უნივერსიტეტის (ვაშინგტონი, აშშ) საერთაშორისო სამართლის მაგისტრის ხარისხსა და შავი ზღვის საერთაშორისო უნივერსიტეტის (თბილისი, საქართველო) განათლების მეცნიერებათა დოქტორის ხარისხს.

ამ თანამდებობაზე დანიშვნამდე, როლანდ პრაისს რუანდაში მსოფლიო ბანკის ოფიციალური წარმომადგენელის პოზიცია ეკავა.
როლანდე პრაისმა, რომელიც იამაიკის მოქალაქეა, მსოფლიო ბანკში საქმიანობა 2006 წელს დაიწყო როგორც იურიდიულ საკითხებში ვიცე-პრეზიდენტის მრჩეველმა. ის მსოფლიო ბანკში სხვადასხვა ოპერაციულ თანამდებობაზე მუშაობდა რამდენიმე რეგიონში, მათ შორისაა ლათინური ამერიკა და კარიბის ზღვის ქვეყნები, აღმოსავლეთ აზია და წყნარი ოკეანის აუზის ქვეყნები, აფრიკა და სამხრეთი აზია. პრაისს ხელმძღვანელი პოზიციები ეკავა როგორც ოპერაციულ მენეჯერს ინდონეზიაში და როგორც მსოფლიო ბანკის ოფიციალურ წარმომადგენელს რუანდაში.
მსოფლიო ბანკში მუშაობის დაწყებამდე პრაისი იყო იამაიკის მთავრობის მრჩეველი საერთაშორისო საჯარო სამართლისა და საერთაშორისო ვაჭრობის საკითხებში და ასევე გახლდათ ვესტ-ინდოეთის უნივერსიტეტის შტატგარეშე ლექტორი.
როლანდ პრაისი ფლობს ლონდონის საუნივერსიტეტო კოლეჯის მაგისტრის ხარისხს საერთაშორისო საჯარო სამართალში; მას მიღებული აქვს სამართლის დოქტორის წოდება მაიამის უნივერსიტეტში და ფლობს ნიუ-იორკის უნივერსიტეტის ბაკალავრის ხარისხს საერთაშორისო ბიზნესსა და მათემატიკაში.

სალომე მექვაბიშვილი გამოცდილი სპეციალისტია პოლიტიკისა და სტრატეგიული მართვის საკითხებში, რომელსაც მნიშვნელოვანი გამოცდილება აქვს როგორც საჯარო სექტორში, ისე საერთაშორისო განვითარების სფეროში. ამჟამად ის გაეროს სამრეწველო განვითარების ორგანიზაციაში (UNIDO) ეროვნული პროგრამის კოორდინატორის პოზიციაზე მუშაობს, სადაც ხელს უწყობს ინკლუზიური და მდგრადი ინდუსტრიული განვითარების ინიციატივების დაგეგმვასა და განხორციელებას. ამასთანავე, ის ბიზნეს ანალიტიკოსია საქართველოს ინვესტორთა საბჭოში, სადაც ხელს უწყობს მაღალი დონის საჯარო-კერძო დიალოგს საქართველოს მთავრობას, ბიზნეს საზოგადოებას, საერთაშორისო საფინანსო ინსტიტუტებსა და განვითარების პარტნიორებს შორის ქვეყნის ბიზნეს და საინვესტიციო გარემოს გაუმჯობესების მიზნით.

მანამდე სალომეს რამდენიმე პოზიცია ეკავა საჯარო სექტორში, მათ შორის იყო საქართველოს ეკონომიკისა და მდგრადი განვითარების სამინისტროს სტრატეგიული განვითარების დეპარტამენტის ხელმძღვანელი. ამ პერიოდში ის მუშაობდა სხვადასხვა სექტორულ და ეკონომიკური განვითარების სტრატეგიებზე და კოორდინაციას უწევდა საერთაშორისო პარტნიორებთან თანამშრომლობას მნიშვნელოვანი რეფორმების განსახორციელებლად.

სალომე ფლობს საჯარო პოლიტიკისა და მენეჯმენტის მაგისტრის ხარისხს ლონდონის King’s College-დან, სადაც Chevening-ის სტიპენდიით სწავლობდა.

ჯერემი მილსომი გაეროს უფროსი ექსპერტი და მენეჯერია, რომელსაც პროგრამების დაგეგმვისა და მართვის 18 წელზე მეტი გამოცდილება აქვს. გაეროს ნარკოტიკებისა და დანაშაულის წინააღმდეგ ბრძოლის ბიუროში (UNODC) მუშაობისას მან შეიმუშავა და მართა მრავალი პროექტი ნარკოტიკებთან ბრძოლის, ალტერნატიული განვითარების, ეროვნული შესაძლებლობების გაძლიერებისა და ნარკოტიკების მოხმარების შემცირების საკითხებზე.

იგი მუშაობდა გაეროს ოფისებში მიანმარში, ავღანეთსა და უზბეკეთში, ხოლო საერთაშორისო განვითარების სფეროში სხვა თანამდებობებზე საქმიანობდა სამხრეთ-აღმოსავლეთ აზიისა და წყნარი ოკეანის კუნძულების რეგიონში.

მანამდე იგი ხელმძღვანელობდა ავღანეთში ნარკოტიკებთან ბრძოლის პროგრამას, რომელიც ფოკუსირებული იყო ეროვნული შესაძლებლობების გაძლიერებაზე, პოლიტიკის შემუშავებასა და ალტერნატიული საარსებო წყაროების მხარდაჭერაზე.

იგი ფლობს სოციალურ მეცნიერებათა და გარემოსდაცვითი მეცნიერებების ბაკალავრის ხარისხებს ავსტრალიის ეროვნული უნივერსიტეტიდან და სოციალურ მეცნიერებათა დოქტორის ხარისხს მელბურნის უნივერსიტეტიდან.