გავლენაზე ორიენტირებული ინვესტიციები სულ უფრო მნიშვნელოვან როლს ასრულებს გლობალურ ეკონომიკაში, რადგან კერძო კაპიტალი ეტაპობრივად მიემართება ისეთი ინიციატივებისკენ, რომლებიც ფინანსურ უკუგებასთან ერთად გაზომვად სოციალურ და გარემოსდაცვით შედეგებს ქმნის. კლიმატის ცვლილების, მზარდი უთანასწორობისა და მდგრადი განვითარების გამოწვევების ფონზე, გავლენაზე ორიენტირებული ინვესტიციები ეკონომიკური ზრდის დაჩქარების მძლავრ ინსტრუმენტად ჩამოყალიბდა – ინსტრუმენტად, რომელიც ერთდროულად ქმნის ხელშესახებ სარგებელს ადამიანებისა და პლანეტისთვის.საქართველოსთვის გავლენაზე ორიენტირებული ინვესტიციები მნიშვნელოვან შესაძლებლობას წარმოადგენს. ქვეყნის სტრატეგიული მდებარეობა, განახლებადი ენერგიის პოტენციალი, მზარდი დაკავშირებადობა, განვითარებადი კაპიტალის ბაზრები და დიდი პოტენციალი ისეთ სექტორებში, როგორიცაა სოფლის მეურნეობა, ლოგისტიკა და მდგრადი ტურიზმი, ნოყიერ ნიადაგს ქმნის ისეთი ინვესტიციებისთვის, რომლებიც ფინანსურ მაჩვენებლებს პოზიტიურ სოციალურ და გარემოსდაცვით ზეგავლენასთან აერთიანებს.გავლენაზე ორიენტირებული ინვესტიციები სულ უფრო მნიშვნელოვან როლს ასრულებს გლობალურ ეკონომიკაში, რადგან კერძო კაპიტალი ეტაპობრივად მიემართება ისეთი ინიციატივებისკენ, რომლებიც ფინანსურ უკუგებასთან ერთად გაზომვად სოციალურ და გარემოსდაცვით შედეგებს ქმნის. კლიმატის ცვლილების, მზარდი უთანასწორობისა და მდგრადი განვითარების გამოწვევების ფონზე, გავლენაზე ორიენტირებული ინვესტიციები ეკონომიკური ზრდის დაჩქარების მძლავრ ინსტრუმენტად ჩამოყალიბდა – ინსტრუმენტად, რომელიც ერთდროულად ქმნის ხელშესახებ სარგებელს ადამიანებისა და პლანეტისთვის.საქართველოსთვის გავლენაზე ორიენტირებული ინვესტიციები მნიშვნელოვან შესაძლებლობას წარმოადგენს. ქვეყნის სტრატეგიული მდებარეობა, განახლებადი ენერგიის პოტენციალი, მზარდი დაკავშირებადობა, განვითარებადი კაპიტალის ბაზრები და დიდი პოტენციალი ისეთ სექტორებში, როგორიცაა სოფლის მეურნეობა, ლოგისტიკა და მდგრადი ტურიზმი, ნოყიერ ნიადაგს ქმნის ისეთი ინვესტიციებისთვის, რომლებიც ფინანსურ მაჩვენებლებს პოზიტიურ სოციალურ და გარემოსდაცვით ზეგავლენასთან აერთიანებს.შეჯამების სახით, შეიძლება ითქვას, რომ გაეროს როლი არა ინვესტორების ჩანაცვლება, არამედ მდგრადი განვითარებისთვის ბაზრების ამუშავებაა  – იმ ინსტიტუტების, პარტნიორობებისა და საინვესტიციო პროექტების პორტფელის (pipelines) შექმნის გზით, რომელიც საქართველოში გავლენაზე ორიენტირებული ინვესტიციების ეფექტური მასშტაბირების შესაძლებლობას იძლევა.შეგიძლიათ, გაგვიზიაროთ გაეროს მიერ მხარდაჭერილი იმ ინიციატივების ან მიდგომების მაგალითები, რომლებიც ხელს უწყობს ინკლუზიურ ეკონომიკურ ზრდას, კლიმატის მიმართ მედეგობას ან სოციალურ განვითარებას საქართველოში?გაეროს ქვეყნის გუნდი მხარს უჭერს ინიციატივების ფართო სპექტრს, რომლებიც მიზნად ისახავს ინკლუზიური ეკონომიკური ზრდის დაჩქარებას, კლიმატის ცვლილებებისადმი მედეგობის გაძლიერებასა და სოციალური განვითარების ხელშეწყობას. გაერო მხარს უჭერს ეკონომიკურ ინკლუზიას ისეთი პროგრამების მეშვეობით, რომლებიც ფოკუსირებულია სოფლისა და ქალაქის განვითარებაზე, საჯარო-კერძო პარტნიორობაზე, მეწარმეობაზე, პროფესიული განათლების რეფორმაზე, მცირე ბიზნესის კონკურენტუნარიანობაზე, ციფრული ტექნოლოგიების დანერგვაზე როგორც კერძო, ისე საჯარო სერვისებში, დაკავშირებადობაზე და მწვანე ეკონომიკურ ტრანზიციაზე. ეს ძალისხმევა ხელს უწყობს ისეთ ქრონიკულ გამოწვევებთან გამკლავებას, როგორიცაა უმუშევრობა და ქალთა სამუშაო ძალის ჩართულობის შედარებით დაბალი მაჩვენებელი.გაეროს ქალთა ორგანიზაცია კერძო სექტორთან პარტნიორობით ხელს უწყობს კომპანიებში ქალთა გაძლიერების პრინციპების დანერგვას. 2024 წლის ბოლომდე, WEP-ის ხელმომწერმა კომპანიებმა საქართველოში 71 000-ზე მეტ ქალს გაუწიეს მხარდაჭერა, რამაც მათთვის გააუმჯობესა ხელმისაწვდომობა ფინანსებზე, ჯანდაცვასა და ციფრულ ინსტრუმენტებზე და, ამავდროულად, ხელი შეუწყო სამუშაო ადგილებზე გენდერული სტერეოტიპების დაძლევას.კიდევ ერთი მაგალითია გაეროს სურსათისა და სოფლის მეურნეობის ორგანიზაციის ინიციატივა, რომელიც ხელს უწყობს კლიმატგონივრული სოფლის მეურნეობის განვითარებას, სურსათის უვნებლობის სტანდარტების დანერგვასა და სოფლის ინტეგრირებულ განვითარებას ფერმერთა სკოლების (Farmer Field Schools) და ცხოველთა იდენტიფიკაციისა და მიკვლევადობის ეროვნული სისტემის (NAITS) მეშვეობით. აღნიშნული პროგრამა ხელს უწყობს მეცხოველეობისა და სოფლის მეურნეობის სექტორების მოდერნიზებას, აძლიერებს სოფლის ეკონომიკის კონკურენტუნარიანობას და ქმნის სამუშაო ადგილებს არა მხოლოდ სოფლის მეურნეობის მიმართულებით, არამედ სხვა სფეროებშიც.კლიმატის ცვლილებისადმი ადაპტაცია და კატასტროფების რისკის შემცირება წარმოადგენს გაეროს უმთავრეს პრიორიტეტებს საქართველოში. გაეროს განვითარების პროგრამის ინიციატივა 100 თემი, 100 ნაბიჯი კლიმატგონივრული მომავლისკენ, რომელიც კლიმატის მწვანე ფონდის (GCF) მხარდაჭერით ხორციელდება, გარემოს დაცვისა და სოფლის მეურნეობის სამინისტროსთან და ორ სამოქალაქო ორგანიზაციასთან – შავი ზღვის ეკო-აკადემიასა და Hydroc-თან პარტნიორობით, მუშაობს 11 მდინარის აუზში მდებარე 100 მაღალი რისკის მქონე თემთან ბუნებრივი კატასტროფების საფრთხეების შესამცირებლად. პროგრამა ასევე აძლიერებს კლიმატის ცვლილებასთან ადაპტაციის შესაძლებლობებს ჰიდრომეტეოროლოგიური საფრთხეების მრავალმხრივი რისკების რუკების შედგენის, ადრეული გაფრთხილების სისტემებისა და კლიმატური რისკების მართვის დანერგვის გზით.მთლიანობაში, გაეროს მდგრადი განვითარების თანამშრომლობის ჩარჩო – პროგრამა განსაკუთრებულ ყურადღებას უთმობს რეგიონული უთანასწორობის შემცირებას, დეცენტრალიზებული და ინკლუზიური მმართველობის გაძლიერებას, ადამიანის უფლებების დაცვასა და იმის უზრუნველყოფას, რომ ეკონომიკური და სოციალური განვითარების შედეგებით საქართველოს ყველა თემმა ისარგებლოს.საქართველოში გაეროს ქვეყნის გუნდის პერსპექტივიდან, რა ძირითადი შესაძლებლობები და გამოწვევები არსებობს ისეთი ინვესტიციების მოზიდვის კუთხით, რომლებიც ფინანსურ უკუგებასთან ერთად გაზომვად სოციალურ და გარემოსდაცვით ზემოქმედებას ქმნის? საქართველოს აქვს ძლიერი პოტენციალი გავლენაზე ორიენტირებული ინვესტიციების მოსაზიდად მისი სტრატეგიული მდებარეობის, სწრაფად მზარდი დაკავშირებადობის, განახლებადი ენერგიის რესურსების, სოფლის მეურნეობის სექტორისა და ძლიერი ეკონომიკური ზრდის წყალობით. ამავდროულად, ქვეყანას აქვს მტკიცე ერთგულება მდგრადი განვითარების მიზნებისადმი, რაც ნოყიერ ნიადაგს ქმნის ისეთი ინვესტიციებისთვის, რომლებიც ეკონომიკურადაც გამართლებულია და სოციალური ზეგავლენის მქონეც.მთავარი შესაძლებლობები მოიცავს განახლებად ენერგიას, მდგრად ტურიზმს, სოფლის მეურნეობას, ლოგისტიკას და ცირკულარული ეკონომიკის ბიზნესებს, როგორიცაა ნარჩენების გადამუშავება და მართვა. საქართველოს ჰიდროენერგეტიკული, მზისა და ქარის ენერგიის პოტენციალს, ისეთ პროექტებთან ერთად, როგორიცაა შავი ზღვის წყალქვეშა კაბელი, შეუძლია, ხელი შეუწყოს ქვეყნის პოზიციონირებას რეგიონულ მწვანე ენერგეტიკულ ჰაბად. ამ ინვესტიციებს შეუძლია სამუშაო ადგილების შექმნა, ენერგოუსაფრთხოების გაუმჯობესება და ემისიების შემცირება.ასევე, საქართველოს აქვს შესაძლებლობები დაბალნახშირბადიანი ტრანსპორტის, კლიმატის ცვლილებებისადმი მედეგი ინფრასტრუქტურის, ციფრული განათლების, ტელემედიცინისა და ქალთა მიერ მართული ბიზნესებისა და მიკრო, მცირე და საშუალო საწარმოების მხარდაჭერის მიმართულებით. აღნიშნულ სექტორებს შეუძლია,ხელი შეუწყონ ქალაქსა და სოფელს შორის არსებული უთანასწორობის შემცირებას, ფინანსური ინკლუზიის გაუმჯობესებასა და დასაქმების შესაძლებლობების გაფართოებას.მთლიანობაში, საქართველო კარგ შესაძლებლობებს სთავაზობს ისეთ ინვესტიციებს, რომლებიც ფინანსურ უკუგებას პოზიტიურ სოციალურ და გარემოსდაცვით გავლენასთან აერთიანებს. თუმცა, ამ პოტენციალის რეალიზება მოითხოვს უფრო ძლიერ ინსტიტუტებს, უკეთეს რეგულაციებს, გაუმჯობესებულ მონაცემთა სისტემებსა და უწყვეტ თანამშრომლობას მთავრობას, განვითარების პარტნიორებსა და კერძო სექტორს შორის.  ამ მხრივ, მთავარი ამოცანაა ძირითად დაინტერესებულ მხარეებთან მყარი პარტნიორობებისა და კოალიციების შექმნა ყველა დონეზე, რათა ფინანსური ინვესტიციები რეალურად აისახოს მდგრადი განვითარების მიზნების მიღწევის დაჩქარებასა და ინკლუზიურ განვითარებაში.როგორ შეუძლია საერთაშორისო ორგანიზაციებს, მთავრობებს, ფინანსურ ინსტიტუტებსა და კერძო სექტორს შორის უფრო მჭიდრო თანამშრომლობას საქართველოში მდგრადი განვითარების დაჩქარება?აუცილებელი პირობა მკაფიოა: განვითარების ორგანიზაციებმა, კერძო ინვესტორებმა, ფინანსურმა ინსტიტუტებმა, მთავრობამ და კერძო სექტორმა საკუთარი პრიორიტეტები და ფინანსური ინსტრუმენტები მდგრადი განვითარების მიზნებს უნდა შეუსაბამონ, რათა საქართველოში გრძელვადიანი მდგრადი განვითარების სრული პოტენციალი გამოვლინდეს.საერთაშორისო ორგანიზაციებს, მთავრობებს, ფინანსურ ინსტიტუტებსა და კერძო სექტორს შორის თანამშრომლობას შეუძლია, გააერთიანოს პოლიტიკური ლიდერობა, დაფინანსება, ინოვაციები და ტექნიკური ექსპერტიზა, რათა მიღწეულ იქნას უფრო დიდი და მდგრადი ზეგავლენა ისეთ სფეროებში, როგორიცაა მწვანე ენერგეტიკა, მედეგი ინფრასტრუქტურა, ციფრული ინოვაციები და სოციალური ინკლუზია, რაც დაეხმარება საქართველოს უფრო მედეგი, ინკლუზიური და მდგრადი მომავლის შენებაში. გაერთიანებული ერების ორგანიზაციას შეუძლია მნიშვნელოვანი წვლილი შეიტანოს ტექნიკური დახმარებისა და შესაძლებლობების განვითარების მხარდაჭერაში, გავლენაზე ორიენტირებული საინვესტიციო ფონდებისა და შერეული დაფინანსების მექანიზმების ხელშეწყობაში, ასევე იმ პოლიტიკისა და რეფორმების მხარდაჭერაში, რომლებიც მდგრადი ინვესტიციების განვითარებას უწყობს ხელს.ამ კონტექსტში, გაეროს გლობალური შეთანხმების საქართველოს ქსელი მნიშვნელოვან როლს ასრულებს კერძო სექტორის მობილიზებასა და გაერთიანებაში, ასევე სტრატეგიული გავლენის მქონე ინვესტიციებისა და პასუხისმგებლიანი ბიზნესპრაქტიკის ხელშეწყობაში.როგორ აფასებთ გავლენაზე ორიენტირებული ინვესტიციების ამჟამინდელ როლს მდგრადი განვითარების ხელშეწყობაში გლობალურად და უფრო ფართო რეგიონში?გლობალურად, გავლენაზე ორიენტირებული ინვესტიციები მდგრადი დაფინანსების მნიშვნელოვანი ნაწილი ხდება. მას უკვე შეაქვს წვლილი მდგრად განვითარებაში, თუმცა ტრანსფორმაციულ მასშტაბებისთვის ჯერ კიდევ არ მიუღწევია. მისი მთავარი როლია კერძო, მოგებაზე ორიენტირებული კაპიტალის მიმართვა იმ სოციალური და გარემოსდაცვითი მიზნებისკენ, რომლებიც დაკავშირებულია მდგრადი განვითარების მიზნებთან განსაკუთრებით, ისეთ სფეროებში, როგორიცაა კლიმატის ცვლილება. Vontobel-ის 2025 წლის კვლევის მიხედვით, ინვესტორთა 81% დეკარბონიზაციას მიმდინარე ან სამომავლო მიზნად მიიჩნევს, ხოლო 77% პრიორიტეტს ნულოვან წმინდა ემისიებზე (net-zero) გადასვლას ანიჭებს. ამასთან, სულ უფრო მეტი ყურადღება ეთმობა თანაბარ შესაძლებლობებზე, მრავალფეროვნებასა და ბიომრავალფეროვნებაზე ორიენტირებულ ინვესტიციებს.თვალსაჩინოა რეგიონული ტენდენციებიც.  2024 წელს, ევროპულმა კერძო გავლენაზე ორიენტირებულმა საინვესტიციო ბაზარმა (არაკვოტირებულ აქტივებში განხორციელებული პირდაპირი და არაპირდაპირი ინვესტიციები) ორი წლის განმავლობაში ზრდის შედეგად, 80 მილიარდი ევროდან 190 მილიარდ ევროს მიაღწია.[1] ზოგიერთი ანგარიშის თანახმად, უფრო ფართო ევროპული გავლენის ბაზარი 230 მილიარდ ევროდ არის შეფასებული[2]. ამ ზრდას მნიშვნელოვნად განაპირობებს ინსტიტუციური ინვესტორების ჩართულობა და მყარი მარეგულირებელი გარემო, რომელიც შექმნილია იმისთვის, რომ ფინანსურ უკუგებასთან ერთად უზრუნველყოს გაზომვადი სოციალური და გარემოსდაცვითი სარგებელი.გავლენაზე ორიენტირებული ინვესტიციები სამხრეთ კავკასიაში (სომხეთი, აზერბაიჯანი და საქართველო) ფოკუსირებულია განახლებად ენერგიაზე, კლიმატის ცვლილებებისადმი მედეგობაზე, მდგრად სოფლის მეურნეობაზე, ტექნოლოგიურ ინოვაციებზე, რეგიონულ დაკავშირებადობაზე და შუა დერეფნის (Middle Corridor) ინფრასტრუქტურაზე, მდგრადი და თანაბარი ზრდის უზრუნველსაყოფად. კვლევის შედეგები აჩვენებს, რომ სწორი საინვესტიციო ჩარჩოებისა და მარეგულირებელი სტიმულების არსებობის შემთხვევაში, შესაძლებელია გავლენაზე ორიენტირებული ინვესტიციების სრული პოტენციალის რეალიზება.რა მთავარი გზავნილი გექნებოდათ ბიზნესებისა და ინვესტორებისთვის, რომლებიც ფინანსურ შედეგებთან ერთად სოციალური და გარემოსდაცვითი გავლენის შექმნასაც ისახავენ მიზნად?გამოწვევები, რომელთა წინაშეც დღეს მსოფლიო დგას, მათ შორის, კლიმატის ცვლილება, უთანასწორობა და მყიფე მიწოდების ჯაჭვები, ინოვაციურ ფინანსურ გადაწყვეტებს მოითხოვს. გავლენაზე ორიენტირებული ინვესტიციები ბიზნესებსა და ინვესტორებს საშუალებას აძლევს, მიიღონ ფინანსური უკუგება და ამავდროულად, უზრუნველყონ პოზიტიური სოციალური და გარემოსდაცვითი შედეგები, როგორიცაა სამუშაო ადგილების შექმნა ნაკლებად განვითარებულ თემებში, კლიმატის ცვლილებებისადმი მედეგი ინფრასტრუქტურის ან სასიცოცხლოდ მნიშვნელოვან სერვისებზე წვდომის გაუმჯობესება.გრძელვადიანი წარმატების მისაღწევად, ბიზნესებსა და ინვესტორებს სჭირდებათ მკაფიო მიზნები, ძლიერი მმართველობა და გრძელვადიანი პარტნიორობა საჯარო და კერძო სექტორებს შორის. კომპანიებს, რომლებიც გავლენაზე ორიენტირებულ სტრატეგიებს ნერგავენ, შეუძლიათ, შეამცირონ საოპერაციო რისკები, გააძლიერონ მედეგობა და მოიზიდონ ისეთი ინვესტორები, რომლებიც პრიორიტეტს გრძელვადიან ღირებულებასა და სოციალურ პასუხისმგებლობას ანიჭებენ.  გაეროს 2026-2030 წლების საქართველოსთან თანამშრომლობის ჩარჩო პროგრამის ფარგლებში, ჩვენ ვაფუძნებთ კერძო სექტორის საკონსულტაციო ჯგუფს, რათა ხელი შევუწყოთ უფრო სტრუქტურირებულ დიალოგს მდგრადი განვითარების შესახებ კერძო სექტორის ძირითად დაინტერესებულ მხარეებთან. მსურს, ვისარგებლო შესაძლებლობით და მოვიწვიო ბიზნესსაზოგადოების წარმომადგენლები ამ პროცესში ჩასართავად. მოხარული ვიქნებით, თუ დაუკავშირდებით გაეროს მუდმივი კოორდინატორის ოფისს ან თქვენს კოლეგებს გაეროს სხვადასხვა სააგენტოში, ამ ინიციატივის შესახებ დამატებითი ინფორმაციის მისაღებად. ვინაიდან კერძო სექტორი მნიშვნელოვან გავლენას ახდენს ეკონომიკურ, სოციალურ და გარემოსდაცვით პროცესებზე, მდგრადი ბიზნესპრაქტიკა აუცილებლობაა და არა არჩევანი. ისეთი გლობალური ინიციატივები, როგორიცაა გაეროს გლობალური შეთანხმება, ასახავს პასუხისმგებლიანი ფინანსებისადმი მზარდ საერთაშორისო ერთგულებას.გავლენაზე ორიენტირებული ინვესტიციებისა და მდგრადი დაფინანსების გაფართოებით, კაპიტალს შეუძლია, ხელი შეუწყოს უფრო ძლიერი თემების ჩამოყალიბებას, შეამციროს უთანასწორობა და დააჩქაროს გადასვლა უფრო მედეგი და მდგრადი მომავლისკენ.დასასრულს, მინდა ხაზგასმით აღვნიშნო, რომ კერძო ინვესტორს აქვს არაერთი შესაძლებლობა, ითანამშრომლონ ისეთ სტრატეგიულ განვითარების პარტნიორებთან, როგორებიც არიან გაერო, მსოფლიო ბანკი, მასპინძელი მთავრობები და დონორები. ასეთი თანამშრომლობა რესურსების გაერთიანებასა და ინვესტიციების უფრო ფართო გავლენად გარდაქმნას უწყობს ხელს. გაერო მზად არის, ხელი შეუწყოს მსგავსი პარტნიორობების განვითარებასა და გაფართოებას, განსაკუთრებით – საქართველოში.---------------[1] GSG / ევროპული გავლენაზე ორიენტირებული ინვესტიციების კონსორციუმი — „გავლენის მასშტაბი“ (2024 წლის გამოცემა): ანგარიშის გვერდზე აღნიშნულია: „ევროპული კერძო გავლენაზე ორიენტირებული ინვესტიციების ბაზარი — რომელიც მოიცავს როგორც პირდაპირ, ისე არაპირდაპირ ინვესტიციებს არასაჯარო აქტივებში — შეფასებულია 190 მილიარდ ევროდ…“ და: „კერძო გავლენაზე ორიენტირებული ინვესტიციების ბაზარმა მნიშვნელოვანი ზრდა აჩვენა — ბოლო ორი წლის განმავლობაში არასაჯარო აქტივებში განხორციელებული ინვესტიციები 80 მილიარდი ევროდან 190 მილიარდ ევრომდე გაიზარდა“.https://www.gsgimpact.org/resources/gsg-impact-publications-reports/the-size-of-impact-main-takeaways-from-the-european-impact-investing-market-siFing-exercise[2] ფონდი“ Fondo Italiano d’Investimento“ და დფონდი“Human Foundation“: ევროპაში გავლენაზე ორიენტირებული ინვესტიციების ბაზრის მოცულობა 230 მილიარდ ევროს შეადგენს – ფონდი “ Fondo Italiano d’Investimento“ორიგინალი ვერსია იხილეთ: https://unglobalcompact.ge/sustainability-spotlight/en/impact-investing-and-accelerating-sustainable-development-the-united-nations-vision-for-georgia/  

გაეროს 2025 წლის წლიური ანგარიში ასახავს წელს, რომელიც პარტნიორობით, გამძლეობითა და მდგრადი განვითარების გზაზე მიღწეული ერთობლივი წარმატებებით გამოიხატა. ეს წელი ასევე იყო 2021–2025 წლების გაეროს მდგრადი განვითარების თანამშრომლობის ხელშეკრულების დასკვნითი ეტაპი — ხუთწლიანი პარტნიორობის, რომელიც საქართველოსა და გაეროს შორის ადამიანების ცხოვრების გაუმჯობესებასა და ქვეყნის მასშტაბით ინკლუზიური, ყოვლისმომცველი განვითარების მხარდაჭერაზე იყო ორიენტირებული.იმ პირობებში, როდესაც საქართველო აგრძელებდა ეკონომიკურ ცვლილებებთან, სოციალურ ტრანსფორმაციასა და რეგიონულ გამოწვევებთან გამკლავებას, გაერო მჭიდროდ თანამშრომლობდა სახელმწიფო ინსტიტუტებთან, სამოქალაქო საზოგადოებასთან, ადგილობრივ თემებსა და განვითარების პარტნიორებთან, რათა ყველასთვის სამართლიანი და სტაბილური შესაძლებლობები შეექმნა.ანგარიშის შესავალში გაეროს მუდმივმა კოორდინატორმა, დიდიე ტრებიუკმა, 2025 წელი აღწერა, როგორც „გადამწყვეტი პერიოდი საქართველოსა და გაეროს შორის პარტნიორობისთვის“. მან ხაზი გაუსვა თანამშრომლობის, ღია დიალოგისა და ინკლუზიური განვითარების მნიშვნელობას და აღნიშნა გაეროს, როგორც სანდო პარტნიორის როლი, რომელიც სხვადასხვა ჯგუფს აერთიანებს პრობლემების გადასაჭრელად და ერთობლივი ქმედებების მხარდასაჭერად.დოკუმენტი მიმოიხილავს 2021–2025 წლების თანამშრომლობის ხელშეკრულების ფარგლებში მიღწეულ შედეგებს, განსაკუთრებით დემოკრატიული მმართველობის, ადამიანის უფლებების, სოციალური ჩართულობის, ეკონომიკური მდგრადობისა და კლიმატის ცვლილების წინააღმდეგ მიმართული ღონისძიებების სფეროებში. წლის განმავლობაში გაეროს სააგენტოები მხარს უჭერდნენ რეფორმებს, რომლებიც მიზნად ისახავდა საჯარო ინსტიტუტების გაძლიერებას, ხარისხიან სერვისებზე ხელმისაწვდომობის გაუმჯობესებას, ადამიანის უფლებების დაცვასა და ქალებისა და ახალგაზრდებისთვის მეტი შესაძლებლობების შექმნას.მმართველობის გაძლიერება და ადამიანის უფლებების დაცვა კვლავ მთავარ პრიორიტეტებად რჩებოდა. პროგრამები ფოკუსირებული იყო ანგარიშვალდებული ინსტიტუტების ჩამოყალიბებაზე, მართლმსაჯულების ხელმისაწვდომობის გაუმჯობესებაზე, გადაწყვეტილების მიღების პროცესში ქალთა მონაწილეობასა და დემოკრატიული მმართველობის ხელშეწყობაზე. სამოქალაქო საზოგადოების ორგანიზაციები, მუნიციპალიტეტები და საჯარო უწყებები ერთობლივად მუშაობდნენ გამჭვირვალობისა და მოქალაქეთა, განსაკუთრებით ქალებისა და ახალგაზრდების, ჩართულობის გასაზრდელად. ანგარიშში ხაზგასმულია, რომ ძლიერი ინსტიტუტები აუცილებელია გრძელვადიანი სტაბილურობის, საზოგადოებრივი ნდობისა და ინკლუზიური განვითარებისთვის.სასიცოცხლოდ მნიშვნელოვან სერვისებზე ხელმისაწვდომობის გაუმჯობესება გაეროს საქმიანობის ცენტრალურ ნაწილად დარჩა. მოშორებულ რეგიონებსა და მოწყვლად თემებში გაეროს სააგენტოები მხარს უჭერდნენ ჯანდაცვის, განათლებისა და სოციალური დაცვის სისტემების სრულყოფას. ინკლუზიურმა და გენდერულად მგრძნობიარე მიდგომებმა ხელი შეუწყო იმას, რომ შეზღუდული შესაძლებლობის მქონე პირები, ბავშვები, ქალები და მარგინალიზებული ჯგუფები ყურადღების მიღმა არ დარჩენილიყვნენ. ეს ძალისხმევა ასახავდა გაეროს მტკიცე ერთგულებას მდგრადი განვითარების მიზნებისა (SDGs) და ადამიანის უფლებების საერთაშორისო სტანდარტებისადმი.გასულ წელს ეკონომიკური მდგრადობის უზრუნველყოფაც ერთ-ერთ მთავარ მიმართულებას წარმოადგენდა. გაერო მხარს უჭერდა მეწარმეობას, ინოვაციებს, ადგილობრივ თვითმმართველობასა და ინკლუზიურ ეკონომიკურ შესაძლებლობებს, რათა ეკონომიკურ ზრდას ადამიანების ყოველდღიურ ცხოვრებაზე რეალური, პოზიტიური გავლენა მოეხდინა. ახალგაზრდების დასაქმება, ქალთა ეკონომიკური გაძლიერება, ციფრული ტრანსფორმაცია და მწვანე ბიზნესის მხარდაჭერა მრავალი პროგრამის პრიორიტეტად იქცა.განსაკუთრებული ყურადღება დაეთმო მოწყვლად და კონფლიქტის შედეგად დაზარალებულ თემებს. მიზნობრივი პროგრამების მეშვეობით გაერო ხელს უწყობდა სოციალური დაცვის სისტემების გაძლიერებას, საარსებო წყაროების შექმნასა და გრძელვადიანი მდგრადობის უზრუნველყოფას. ძალისხმევა მიმართული იყო იძულებით გადაადგილებული პირებისა და ადმინისტრაციული გამყოფი ხაზების მიმდებარედ მცხოვრები მოსახლეობის ღირსების, სოციალური ჩართულობისა და მუდმივი მხარდაჭერის უზრუნველყოფისკენ. მიმდინარე საჭიროებების დაკმაყოფილების გარდა, ეს ინიციატივები მიზნად ისახავდა ნდობის აღდგენასა და თემების მედეგობის განმტკიცებას.ამავდროულად, გაერო კვლავ უწევდა პარტნიორობას საქართველოს გარემოსდაცვითი და კლიმატური მიზნების მიღწევაში მწვანე განვითარების ინიციატივებისა და კლიმატის პოლიტიკის ხელშეწყობის გზით. ბუნებრივი რესურსების მდგრადი მართვიდან დაწყებული, კლიმატისადმი მედეგობისა და მწვანე ტრანზიციის პროგრამების ჩათვლით, გარემოსდაცვითი მდგრადობა სულ უფრო მეტად დაუკავშირდა სოციალურ და ეკონომიკურ განვითარებას. კლიმატის პოლიტიკის, მდგრადი სოფლის მეურნეობისა და გარემოს დაცვის მხარდაჭერა ასახავდა საქართველოს მზარდ მზაობას ეკოლოგიური განვითარების გზაზე.2025 წელს გაეროს სისტემის მხარდაჭერით მიღწეული მთავარი შედეგები:ამბიციური კლიმატური ვალდებულებები: საქართველომ მიიღო დღემდე ყველაზე ამბიციური კლიმატური ვალდებულება ეროვნულად განსაზღვრული წვლილის (NDC 3.0) ფარგლებში და 2030 წლისთვის სათბურის აირების წმინდა ემისიების შემცირების მიზნობრივი მაჩვენებელი 1990 წლის დონესთან შედარებით 35%-იდან 47%-მდე გაზარდა.სურსათის უვნებლობის გაუმჯობესება: სფეროს მართვა დაიხვეწა „სურსათის დანაკარგებისა და ნარჩენების შემცირებისა და სურსათის დონაციის შესახებ“ კანონის მიღებით, ასევე სურსათის უვნებლობის ახალი სტრატეგიისა და სურსათის ნარჩენების მართვის კონცეფციის დამტკიცებით.სამართლებრივი და სტრატეგიული რეფორმები: განხორციელდა მნიშვნელოვანი ცვლილებები ადრეული ქორწინების პრევენციის, მშობელთა შვებულების პოლიტიკის გაძლიერების, გენდერულად მგრძნობიარე და ბავშვთა უფლებებზე დაფუძნებული ბიუჯეტირების გაფართოებისა და მართლმსაჯულების ხელმისაწვდომობის გაუმჯობესების მიმართულებით. ჯამში, 1,511-მა მოწყვლადმა პირმა ისარგებლა უფასო იურიდიული დახმარებით.მიღწევებისა და პოლიტიკური რეფორმების მიღმა, ანგარიშის ყველაზე დიდ წარმატებად შესაძლოა თავად მრავალმხრივი თანამშრომლობა ჩაითვალოს. წლის განმავლობაში გაეროს 21-ზე მეტი სტრუქტურა პარტნიორობდა საქართველოს მთავრობასთან, მუნიციპალიტეტებთან, სამოქალაქო საზოგადოებასთან, აკადემიურ წრეებთან, განვითარების პარტნიორებსა და კერძო სექტორთან.ახალი, 2026–2030 წლების თანამშრომლობის ხელშეკრულებაც ქვეყნის მასშტაბით 300-ზე მეტ დაინტერესებულ მხარესთან კონსულტაციების საფუძველზე შემუშავდა, რაც კიდევ ერთხელ ადასტურებს მტკიცე ნებას, რომ მომავალი განვითარების ძალისხმევა იყოს უფრო ინკლუზიური, მონაწილეობითი და ადამიანების რეალურ საჭიროებებზე მორგებული.ანგარიშის დასკვნით ნაწილში აღნიშნულია, რომ მყარი პარტნიორობა და ადამიანის უფლებების, თანასწორობისა და მდგრადობისადმი უწყვეტი ერთგულება კვლავაც გადამწყვეტი იქნება იმის უზრუნველსაყოფად, რომ საქართველოს განვითარების გზაზე არავინ დარჩეს ყურადღების მიღმა.

საქართველოს მთავრობის და გაერთიანებული ერების ორგანიზაციის ერთობლივი ორგანიზებით, „2026-2030 წწ გაეროს მდგრადი განვითარების თანამშრომლობის ხელშეკრულების“ (UNSDCF) ერთობლივი სამეთვალყურეო საბჭოს პირველი ყოველწლიური შეხვედრა გაიმართა.ერთობლივი სამეთვალყურეო საბჭო „თანამშრომლობის ხელშეკრულების“ შემუშავებისა და განხორციელებისთვის სტრატეგიულ ზედამხედველობას აწარმოებს, რაც ასევე ეროვნულ დონეზე პასუხისმგებლობის აღებას განაპირობებს, მეორე მხრივ კი საქართველოს განვითარების პრიორიტეტების შესაბამისობას უზრუნველყოფს „მდგრადი განვითარების მიზნებთან“ (SDGs).შეხვედრას ერთობლივად უძღვებოდნენ ბ-ნი ზვიად ბარქაია, საქართველოს მთავრობის ადმინისტრაციის უფროსის მოადგილე და ბ-ნი დიდიე ტღებიუკი, გაერთიანებული ერების ორგანიზაციის მუდმივი კოორდინატორი საქართველოში. ბ-ნმა ზვიად ბარქაიამ თავის სიტყვაში აღნიშნა, რომ ეს შეხვედრა საქართველოს მთავრობასა და გაერთიანებული ერების ორგანიზაციას შორის სტრატეგიული თანამშრომლობის ახალი ფაზის დასაწყისს წარმოადგენდა. მან ხაზი გაუსვა, რომ  „2026–2030 წწ გაეროს მდგრადი განვითარების თანამშრომლობის ხელშეკრულება“ ასახავს ქვეყნის ინტერესებს და მდგრადი განვითარების მიზნებს ეხმიანება.ბ-ნმა დიდიე ტღებიუკმა, გაეროს მუდმივმა კოორდინატორმა განაცხადა: „თანამშრომლობის ხელშეკრულება, რომელსაც ახლა ვახორციელებთ, უფრო მეტ ამბიციას ასახავს. ის საქართველოს ეროვნულ პრიორიტეტებს, მეორე მხრივ კი სწრაფად ცვალებად გლობალურ კონტექსტს ეხმიანება, ამავდროულად კი კვლავ ადასტურებს ჩვენი მხრიდან აღებულ საერთო ვალდებულებას, რომ დაჩქარდეს პროგრესი მდგრადი განვითარების მიზნების მიღწევის გზაზე. აღნიშნული ამბიციის მიღწევისთვის მოგვეთხოვება, რომ არა მარტო უკეთესი შედეგები ვაჩვენოთ, არამედ განსხვავებულადაც ვიმუშაოთ - უფრო ძლიერი პარტნიორობებით, უფრო ინტეგრირებული მიდგომებით, ინოვაციური დაფინანსების და საფინანსო მოდალობებით, რითაც მასშტაბის გაზრდა და სისტემური ზეგავლენის მიღწევა იქნება შესაძლებელი“.ქ-ნმა ანა ზეცმა, გაეროს მუდმივი კოორდინატორის ოფისის ხელმძღვანელმა გაეროს ძირითადი  მიღწევები წარმოადგინა ხუთ პრიორიტეტულ სფეროში, რომელთა შორისაა: ეფექტური, გამჭვირვალე და ანგარიშვალდებული ინსტიტუტები; თანაბარი და ინკლუზიური წვდომა ხარისხიან სერვისებზე; ინკლუზიური ეკონომიკური ზრდა და ადამიანური კაპიტალის განვითარება; ადამიანის უსაფრთხოება და მედეგობა; ასევე გარემოს დაცვა და კლიმატის ცვლილებასთან დაკავშირებული ქმედება. აღნიშნული ძალისხმევები  „2021-2025 წწ გაეროს მდგრადი განვითარების თანამშრომლობის ხელშეკრულების“ ფარგლებში განხორციელდა.გაეროს მუდმივმა კოორდინატორმა „2026-2027 წწ ერთობლივი სამუშაო გეგმა“ წარმოადგინა UNSDCF-ის „შედეგების ჯგუფების“ თანათავმჯდომარეებთან ერთად, რომელთა შორის იყვნენ: მამუკა მესხი (გაეროს სურსათისა და სოფლის მეურნეობის ორგანიზაციის წარმომადგენლის მოადგილე საქართველოში), კაორი იშიკავა (გაეროს ქალთა ორგანიზაციის საქართველოს ოფისის ხელმძღვანელი და წარმომადგენელი სამხრეთ კავკასიაში), გიორგი კალაკაშვილი (გაეროს ბავშვთა ფონდის ბავშვთა უფლებების მონიტორინგის სპეციალისტი), დაგლას უები (გაეროს განვითარების პროგრამის მუდმივი წარმომადგენელი საქართველოში), სამინისტროების წარმომადგენლებისა და გაეროს სააგენტოების ხელმძღვანელების მონაწილეობით.  მონაწილეებმა „2026–2030 წწ გაეროს მდგრადი განვითარების თანამშრომლობის ხელშეკრულებით“ გათვალისწინებული შედეგების ოთხი სფერო წარმოადგინეს: ინკლუზიური ზრდა, მწვანე გადასვლა და კლიმატის მედეგობა; განათლება, ჯანმრთელობა და სოციალური დაცვა; მმართველობა, ადამიანის უფლებები და გენდერული თანასწორობა; და მშვიდობის ხელშემწყობი გარემო.მონაწილეებმა 2026–2027 წლების ერთობლივი სამუშაო გეგმა განიხილეს, მათ შორის დაგეგმილი ინტერვენციები და რესურსების განაწილება, ასევე სტრატეგიული პრიორიტეტების განხორციელების მიმართულებით გადასადგმელ ნაბიჯებზე  იმსჯელეს.აღნიშნულ შეხვედრას მთავრობის წარმომადგენლები და გაეროს საქართველოს გუნდის წევრები ესწრებოდნენ. ამ ღონისძიების შედეგად მიღწეული იქნა შეთანხმება 2026-2027 წლის სამუშაო გეგმასთან დაკავშირებით, რომელიც „2026–2030 წწ გაეროს მდგრადი განვითარების თანამშრომლობის ხელშეკრულებით“ გათვალისწინებული ოთხი შედეგის უზრუნველსაყოფად იქნა შემუშავებული.  

ფოტო სიმბოლო. საქართველოში ამჟამად უკვე ფუნქციონირებს 9 კრიზისული ცენტრი, რაც ძალადობაგამოვლილი ქალებისთვის სამართლიანობასა და მხარდაჭერის სერვისებზე ხელმისაწვდომობას მნიშვნელოვნად აუმჯობესებს. ფოტო: გაეროს ქალთა ორგანიზაცია/თაკო რობაქიძესამართლიანობა ყველა ქალისა და გოგოსთვის კანონებში, ბიუჯეტებში, ინსტიტუტებსა და რეალურ ცხოვრებაში უნდა აისახოს. სამართლიანობა მხოლოდ ინსტიტუტების მიერ არ შენდება, ამიტომ ყველა ძალისხმევა, რომელიც მისი ხელმისაწვდომობის გაზრდას ემსახურება, მნიშვნელოვანია. საქართველოში ძალადობაგამოვლილი ქალები აუცილებელ სერვისებზე წვდომისას ბარიერებს კვლავაც აწყდებიან, ამიტომ გაეროს ქალთა ორგანიზაცია, პარტნიორებთან ერთად, მთელი ქვეყნის მასშტაბით კრიზისული ცენტრების ქსელის გაფართოებაზე მუშაობს. ეს ცენტრები ძალადობის მსხვერპლებს იურიდიულ დახმარებას, ფსიქოლოგიურ კონსულტაციას, სოციალური მუშაკის მხარდაჭერას და იმ მნიშვნელოვან ინფორმაციას სთავაზობს, რომელიც მათ ძალადობის ციკლის გარღვევაში ეხმარება. საქართველოში ამჟამად უკვე ფუნქციონირებს 9 კრიზისული ცენტრი, რაც ძალადობაგამოვლილი ქალებისთვის სამართლიანობასა და მხარდაჭერის სერვისებზე ხელმისაწვდომობას მნიშვნელოვნად აუმჯობესებს.„პანიკური შეტევები მქონდა და ექიმმა მირჩია, ფსიქოლოგთანაც მივსულიყავი. სპეციალისტის ძებნა ახლომახლო დავიწყე, რადგან თბილისში სიარულს დამატებითი დრო და თანხები სჭირდებოდა. ასე აღმოვაჩინე ახმეტის კრიზისული ცენტრი, სადაც უკვე 6 თვეა ფსიქოლოგის კონსულტაციებს უსასყიდლოდ გავდივარ. ახლა ბევრად უკეთ ვარ, ეს დახმარება ჩემთვის დიდი შვებაა“, - ამბობს 56 წლის თამარი, რომელიც ახმეტის მუნიციპალიტეტის სოფელ დუისში ცხოვრობს*.გაეროს ქალთა ორგანიზაციისა და საქსტატის 2022 წლის ქალთა მიმართ ძალადობის ეროვნული კვლევის მიხედვით, საქართველოში პარტნიორის მხრიდან ძალადობის გამოცდილების მქონე 10 ქალიდან 7 სულ მცირე ერთ ფსიქოლოგიურ სიმპტომზე მაინც საუბრობს, რაც მიანიშნებს, რომ პარტნიორის მხრიდან ძალადობა მძიმე კვალს არაერთი ქალის მენტალურ ჯანმრთელობაზე ტოვებს.თამარს ორი შვილი ჰყავს. თითქმის 15 წელია განქორწინებულია, თუმცა ტრავმას, რომელიც ყოფილ მეუღლესთან თანაცხოვრებისას მიიღო, დღემდე ებრძვის. ახმეტის კრიზისული ცენტრის პერსონალი მისი და იმ 43 ქალის მთავარი მხარდამჭერია, რომლებმაც დახმარება თამარის მსგავსად მიიღეს. ცენტრი 2024 წლის დასაწყისში ამოქმედდა. ის გაეროს ქალთა ორგანიზაციისა და შვედეთის მხარდაჭერით გაიხსნა და საქართველოს რეგიონული გაძლიერების ფონდთან თანამშრომლობით ფუნქციონირებს.“ქალებისა და გოგოების მიმართ ძალადობის პრევენციასთან ერთად, ძალადობის მსხვერპლი და ძალადობაგამოვლილი ქალებისთვის სერვისების გაუმჯობესება და ხელმისაწვდომობის გაზრდა საქართველოში ოჯახში და ქალთა მიმართ ძალადობასთან ბრძოლის ერთ-ერთი გამოწვევაა. სწორედ ამიტომ, გაეროს ქალთა ორგანიზაცია, ცენტრალურ და ადგილობრივ ხელისუფლებებთან, განვითარების პარტნიორებსა და კერძო სექტორთან ერთად, მთელი ქვეყნის მასშტაბით, თავშესაფრებისა და კრიზისული ცენტრების ქსელის გაფართოებასა და დახვეწაზე მუშაობს”, - აღნიშნავს გაეროს ქალთა ორგანიზაციის წარმომადგენელი საქართველოში კაორი იშიკავა.ამჟამად საქართველოში 9 კრიზისული ცენტრი ფუნქციონირებს, მათ შორის 7-ს სახელმწიფო კურირებს, 2-ს კი — ადგილობრივი არასამთავრობო ორგანიზაცია.ახმეტის კრიზისული ცენტრი — სოლიდარობის სივრცეახმეტის კრიზისული ცენტრი წარმოადგენს სივრცეს, რომელიც, მუნიციპალიტეტის მასშტაბით, ქალებს იურიდიულ კონსულტაციას, ფსიქოლოგის მომსახურებასა და სოციალური მუშაკის სერვისებს სთავაზობს, მუშაობს ქალთა მიმართ და ოჯახში ძალადობის პრევენციისა თუ რეაგირების, არსებული სერვისებისა და შესაძლებლობების შესახებ ცნობიერების გაზრდაზე. ცენტრში ფუნქციონირებს ბავშვთა ოთახიც, სადაც დედებს სერვისებით სარგებლობისას შვილების დროებით დატოვება შეუძლიათ.ბავშვთა ოთახი ახმეტის კრიზისულ ცენტრში. ფოტო: გაერო/გელა ბედიანაშვილიროგორც საქართველოს რეგიონული გაძლიერების ფონდის ხელმძღვანელი იზა ბექაური ამბობს, ახმეტის კრიზისული ცენტრის დახმარებით, განცდილ ძალადობაზე ხმამაღლა სულ უფრო მეტი ქალი ლაპარაკობს და მხარდაჭერასაც ითხოვს. ეს ადგილი იქცა სოლიდარობის სივრცედ, რომლის დახმარებითაც ბევრმა მათგანმა ძალადობისგან თავის დაღწევა და ახალი ცხოვრების დაწყება შეძლო.ძალადობის პრობლემა ჩვენს მუნიციპალიტეტში მწვავედ დგას. უამრავი ქალი სახლში თავადაც შემიფარებია, ამიტომ სულ მინდოდა, ახმეტაში პანკისელი ქალების საჭიროებებზე მორგებული, კომფორტული სივრცე ყოფილიყო. ცენტრის ამოქმედება რომ შემომთავაზეს, ენთუზიაზმით დავთანხმდი. გახსნის შემდეგ ინფორმაცია მალევე გავრცელდა და ჩვენი სერვისებით სარგებლობაც ბევრმა დაიწყო.”იზა ბექაური, საქართველოს რეგიონული გაძლიერების ფონდის ხელმძღვანელიImageახმეტის კრიზისულ ცენტრს თვეში 5-7 ქალი აკითხავს. იზა ბექაური აღნიშნავს, რომ ზოგ მათგანს ურჩევნია, ბენეფიციარად ოფიციალურად არც დარეგისტრირდეს და სერვისებით ისე ისარგებლოს. „სამწუხაროდ, ეკონომიკური შემოსავლისა და საცხოვრებლის არქონის გამო, ბევრი ქალი ძალადობას ისევ ითმენს. ასეთ დროს სჭირდებათ მათ გაძლიერება და ჩვენი მხარდაჭერა, ცოდნა, რომ მარტო არ არიან, გვერდით ვუდგავართ“, - ამბობს ის.სოციალური ნორმები და სტიგმების გამო, ქალები კვლავაც დუმანსაქართველოში ქალთა მიმართ და ოჯახში ძალადობის გამოვლენის მაჩვენებელი გაზრდილია, თუმცა დისკრიმინაციული გენდერული სტერეოტიპებისა და სოციალური ნორმების გამო, არა მხოლოდ ახმეტის მუნიციპალიტეტში, არამედ მთლიანად ქვეყანაში, ბევრი ქალი ძალადობის შესახებ კვლავაც დუმს. გაეროს ქალთა ორგანიზაციისა და საქსტატის 2022 წლის ქალთა მიმართ ძალადობის ეროვნული კვლევის მიხედვით, პარტნიორის მხრიდან ფიზიკური ან/და სექსუალური ძალადობის მსხვერპლი ქალების მესამედზე მეტს (38.2%) გადატანილი ძალადობის შესახებ არავისთვის უთქვამს.„ეს სივრცე ძალიან დიდ როლს ასრულებს. მე, მაგალითად, ფსიქოლოგიურ მხარდაჭერას ვიღებ, თუმცა სხვა ქალებს, რომლებსაც იურიდიული კონსულტაცია სჭირდებათ, კანონებს უხსნიან, მაგალითებით განუმარტავენ, ეუბნებიან, რისი უფლება აქვთ, რა შეუძლიათ, აძლიერებენ, გამოსავლის მოძებნაში ეხმარებიან“, - აღნიშნავს თამარ მაჭარაშვილი.აღსანიშნავია, რომ კრიზისული ცენტრის გუნდი ყველა ქალს ახალი შესაძლებლობების შესახებ ინფორმაციასაც აწვდის. “მე ამითაც ბედნიერი ვარ, რომ ქალებმა იციან: რაც არ უნდა გაუჭირდეთ, შეუძლიათ, ჩვენთან მოვიდნენ, ჩვენი იმედი ჰქონდეთ”, - დასძენს იზა ბექაური.ახმეტის კრიზისული ცენტრი გაეროს ერთობლივი პროგრამის „გენდერული თანასწორობისთვის“ (UNJP4GE) ფარგლებში გაიხსნა და ამავე პროგრამის ფარგლებში ფუნქციონირებს.___________*სახელი, ასაკი და საცხოვრებელი ადგილი შეცვლილია.