როგორ აძლიერებს თამაში თქვენი ბავშვის ფსიქიკურ ჯანმრთელობას

თამაშის მეშვეობით ბავშვები შეისწავლიან და შეიგრძნობენ მათ გარშემო არსებულ სამყაროს. თამაშის დროს მათ უვითარდებათ უმნიშვნელოვანესი უნარები, როგორიცაა მოტორული, შემეცნებითი, სოციალური და ემოციური განვითარების სფეროები. მაგრამ თამაშის მნიშვნელობა ბევრად სცდება ადრეული სწავლების ფარგლებს, რადგან ის ასევე მნიშვნელოვან როლს ასრულებს თქვენი ბავშვის ფსიქიკური ჯანმრთელობის განვითარებაში, და ასევე თქვენი! შეიტყვეთ, რატომ არის სათამაშო დროის გამოყოფა სახალისო და ჯანსაღი საქმიანობა.

ბავშვები, რომლებიც რეგულარულად თამაშობენ მშობლებთან ერთად, ნაკლებად განიცდიან შფოთვას, დეპრესიას, აგრესიას და უძილობას.

თამაში ხელს უწყობს თქვენსა და თქვენს შვილს შორის კავშირის გაძლიერებას. 

გართობისა და სწავლის დროს სახალისო მომენტების გაზიარება ეხმარება ბავშვებსა და მათ აღმზრდელებს ერთმანეთთან დაახლოებაში. თქვენ ხართ თქვენი პატარას პირველი თანამოაზრე, და ამდენად შეგიძლიათ სახლშივე უზრუნველყოთ მათთვის სწავლისა და ურთიერთკავშირის შესაძლებლობა. როდესაც ერთად თამაშობთ, თქვენ უყურებთ სამყაროს თქვენი შვილის პერსპექტივიდან.  

თქვენი შვილისთვის სიყვარულის და ყურადღების მინიჭებით და მყუდრო გარემოს შექმნით თქვენ საფუძველს უყრით ემოციური და სოციალური უნარების განვითარებას, რაც ხელს უწყობს მის ფსიქიკურ ჯანმრთელობას და მომავალ კეთილდღეობას.  

თამაში ხელს უწყობს სტრესის დონის შემცირებას

თამაში, ცეკვა და სიმღერა შესანიშნავი საშუალებაა სტრესის შესამსუბუქებლად, როგორც თქვენი შვილისთვის, ასევე თქვენთვის. როდესაც თქვენ ერთად მხიარულობთ და იცინით, თქვენი სხეული გამოყოფს ენდორფინებს, რაც ხელს უწყობს კეთილდღეობის განცდას.

ერთობლივი თამაშისა ხანმოკლე პერიოდიც კი შეიძლება იყოს მნიშვნელოვანი შეხსენება უფროსებისთვის, რომ მათ შეუძლიათ დროებით დაივიწყონ სამუშაო ან სხვა ვალდებულებები და მხარში ამოუდგნენ ბავშვს. 

კვლევამ ასევე აჩვენა, რომ თამაში და გართობა იცავს ბავშვებს სტრესის გახანგრძლივებული ზემოქმედებისგან. სტრესული სიტუაციების ხანგრძლივმა პერიოდებმა შეიძლება უარყოფითად იმოქმედოს ბავშვის ფიზიკურ და ფსიქიკურ ჯანმრთელობაზე. თამაში და პოზიტიური ურთიერთობა ბავშვებთან და მათ მხარში დგომა ეხმარება ბავშვებს გაუმკლავდნენ სტრესს.  

თამაში ეხმარება ბავშვებს რთული ემოციების გადამუშავებაში

როდესაც ბავშვებს რთულ ემოციურ საკითხებთან უწევთ გამკლავება, ეს ხშირად ვლინდება თამაშის დროს. ამიტომ მნიშვნელოვანია ბავშვებს ჰქონდეთ თამაშისა და გართობის საშუალება, რათა უკეთ გაუმკლავდნენ ისეთ გრძნობებს, როგორიცაა ტკივილი, შიში ან დანაკარგი, და ამავე დროს შეინარჩუნონ ბავშვური ხალისი. თამაში მათ აძლევს საშუალებას გამოხატონ ის, რაც უჭირთ და სრულად ასახსნელად ვერ მოუძებნეს სიტყვები. წარმოსახვითი თამაშის დროს მტკივნეული მოვლენების ხელახლა განმეორებით, პატარები ცდილობენ გაიაზრონ მომხდარის გავლენა. მაგალითად, თუ თქვენი ბავშვი შეესწრო ორი ზრდასრული ადამიანის ჩხუბს, შესაძლოა მათ ეს კონფლიქტი თოჯინებით თამაშის დროს გაითამაშონ. 

თამაში ეხმარება ნდობის ჩამოყალიბებას

თამაშის დროს ან თავსატეხზე მუშაობისას პრობლემების გადაჭრა და შემოქმედებითი გადაწყვეტილებების მოძიება ბავშვებს აძლევს მიღწევისა და თვითრწმენის შეგრძნებას. ბავშვებთან ერთად თამაშისას თქვენი პატარა სწავლობს, რომ მას აფასებენ და მათთან ერთად სასიამოვნოა თამაში. ამიტომ მნიშვნელოვანია, რომ თამაშის დროს ბავშვს დაუთმოთ მთელი ყურადღება და ერთად თამაშს სრული ძალისხმევა მოანდომოთ. გამოცდილების ურთიერთგაზიარება ბავშვს ანიშნებს, რომ ის უყვართ და რომ ის მნიშვნელოვანია - ასე რომ გაიღიმეთ, ჩაერთეთ მათთან თამაშში და ისიამოვნეთ ყოველი წამით!