საქართველოს მოსახლეობის დამოკიდებულება შეზღუდული შესაძლებლობის მქონე პირთა მიმართ. 2020

წინამდებარე კვლევა შეისწავლის საქართველოს სოციალურ გარემოს, სადაც დიდი ყურადღება ეთმობა საზოგადოების დამოკიდებულებას შეზღუდული შესაძლებლობის მქონე პირთა მიმართ შვიდი მიმართულებით - ინფორმირებულობა, სტიგმა და სტერეოტიპები, განათლება, დასაქმება, უფლებები და პრივილეგიები, ძირითადი საჭიროებები და სოციალური ინტეგრაცია, და სახელმწიფო პოლიტიკა.

კვლევა ჩაატარა ქართულმა კვლევითმა კომპანიამ „სოციალური კვლევისა და ანალიზის ინსტიტუტი“ (ISSA) 2019-2020 წლებში.

კვლევა გაეროს განვითარების პროგრამის (UNDP) დაკვეთით განხორციელდა გაეროს ექვსი სააგენტოს ერთობლივი პროგრამის ფარგლებში, რომელიც შეზღუდული შესაძლებლობის მქონე პირების სოციალური დაცვის გაუმჯობესების მიზნით შეიქმნა. მისი ბიუჯეტი 2 მილიონ აშშ დოლარს შეადგენს United Nation’s Fund for Sustainable Development Goals-ის ხელმისაწვდომი რესურსის გათვალისწინებით.

 ძირითადი მიგნებები:

• საქართველოს მოსახლეობის 51.2 პროცენტი თავს ინფორმირებულად მიიჩნევს შშმ პირების უფლებებისა და საჭიროებების შესახებ, ხოლო თითქმის 59 პროცენტი აღნიშნავს, რომ ჰქონია შეხება შშმ პირებთან.
• 67.2 პროცენტი ფიქრობს, რომ შეზღუდული შესაძლებლობის მქონე პირებს სწავლაში ისეთივე წარმატებების მიღწევა შეუძლიათ, როგორც საზოგადოების სხვა წევრებს. გამოკითხულთა თითქმის ნახევარი, 49.4 პროცენტი, აცხადებს, რომ შეზღუდული შესაძლებლობის მქონე პირებს დამოუკიდებლად ცხოვრება შეუძლიათ.
• მოსახლეობის 33.5 პროცენტი მიიჩნევს, რომ საქართველოში შშმ პირების უფლებები არ ირღვევა და 43 პროცენტზე მეტი ფიქრობს, რომ შშმ პირებზე ზრუნვა ხელისუფლების კეთილი ნებაა.
• გამოკითხულთა თითქმის 73 პროცენტი თავს კომფორტულად გრძნობს შშმ პირებთან მუშაობისას და 70 პროცენტისთვის მისაღებია ფიზიკური შეზღუდვების მქონე  პირი გადაწყვეტილების მიმღებად, მაგალითად,  პარლამენტის წევრად.
• გამოკითხულთა აზრით ფსიქიკური და ინტელექტუალური შეზღუდვის მქონე პირები ნაკლებად მისაღები არიან როგორც თანამშრომლად (46.6 პროცენტი), კარის მეზობლად (36.2 პროცენტი), შვილის თანაკლასელად (47.7 პროცენტი).
• გამოკითხულთა უმრავლესობა თვლის, რომ სახელმწიფომ ხელი უნდა შეუწყოს ინკლუზიურ განათლებას სკოლებში, პროფესიულ კოლეჯებსა და უნივერსიტეტებში (70 პროცენტი), შექმნას ინკლუზიური ინფრასტრუქტურა (85,1 პროცენტი) და გაზარდოს შშმ პირთა დახმარება (81,6 პროცენტი).
• 72 პროცენტის აზრით, შშმ პირების წარმომადგენლობის მხარდაჭერა  მმართველობის ყველა დონეზე უნდა წარიმართოს.