მეღვინეობაში წინაპრების კვალდაკვალ

საქართველოს ერთ-ერთ ღვინის მწარმოებელ რეგიონში, ქედის მუნიციპალიტეტის სოფელ გეგელიძეებში მოქცეული ნური სირაბიძის საოჯახო ღვინის მარანი ნატურალური ღვინოების დიდ არჩევანს გვთავაზობს.

ფრიდონ სირაბიძე და მისი მეუღლე მანანა ბოლქვაძე აგრძელებენ ფრიდონის წინაპრებისგან მემკვიდრეობით მიღებულ მევენახეობის საქმეს. ფრიდონ სირაბიძის ბაბუა მთელი ცხოვრება ფლობდა და ამუშავებდა ვენახს ამ ტერიტორიაზე.                            

ვიდრე მოგვითხრობდა იმის შესახებ, თუ როგორ დაიწყო მისმა ოჯახმა ღვინის წარმოება, ფრიდონმა ვაზის რიგი გვაჩვენა. „ბაბუამ პირველად სხვადასხვა ჯიშის ვაზი 1952 წელს გააშენა, როდესაც ამ მიწაზე გადმოსახლდა“, - თქვა მან. „90-იან წლებში მამაჩემმა მეტი ვაზი დარგა“. 

მიუხედავად იმისა, რომ ფრიდონს ოფიციალური განათლება მეღვინეობაში არ აქვს, მისი გატაცება ღვინით იმ მამოძრავებელ ძალად იქცა, რომელმაც წარმატებას მიაღწევინა. 

ფრიდონი ვაზის რიგის ბოლოს დგას და იხსენებს, როგორ გამოიყურებოდა იგი, როდესაც 17 წელზე მეტი ხნის წინ მან გადაწყვიტა მამის კვალს გაჰყოლოდა და მეღვინე გამხდარიყო,. „მახსოვს,ახალგაზრდა ბიჭი როგორ შევედი ჩვენს მარანში და ვნახე ღვინის დუღილი ქვევრში (ღვინო ინახება მრგვალ თიხის ჭურჭელში, რომელიც პირამდე მიწაშია ჩაფლული). მაშინ შემიყვარდა მეღვინეობა“.

ამ საქმით იგი სრულფასოვნად 2006 წელს დაკავდა. ამჟამად ის და მანანა ფლობენ 6000 კვადრატულ მეტრ ვენახს 20-ზე მეტი უნიკალური ენდემური ვაზის ჯიშით, მათ შორის ცოლიკაურისა და უსახელოურის ჩათვლით, რომელიც გაშენებულია გზის გაღმა, მათი სახლის მოპირდაპირე მხარეს და ასევე მცირე ზომის, მაგრამ კარგად აღჭურვილ ღვინის საწარმოს, რომელიც მათი საცხოვრებელი სახლის მომიჯნავედ მდებარეობს. იმის ნაცვლად, რომ ყურძენი ღვინის მწარმოებლებს მიჰყიდოს, ფრიდონი თავად აწარმოებს ღვინის დამზადების სრულ პროცესს, მოსავლის აღებიდან ბოთლებში ჩამოსხმამდე.

რაც მათ ღვინოებს უნიკალურს ხდის, ამბობს ფრიდონ სირაბიძე, არის ტერუარის ხარისხი, კლიმატი და ამინდის პირობები. ნიადაგი ძალიან უხდება ვაზს.

იგი ყურადღებას ამახვილებს უსაფრთხო და ჯანსაღ ღვინოებზე, რომლებიც მზადდება მათ ვენახებში ქიმიკატების გამოყენების გარეშე.

„წარმატების მისაღწევად საჭიროა ნატურალური ღვინოების წარმოება“, - ხაზგასმით აღნიშნავს იგი.

ადგილობრივი დისტრიბუციისთვის ოჯახმა, პარტნიორთან ერთად, გახსნა ღვინის მარანი ბათუმში, რომელიც ღვინოს უშუალოდ მომხმარებელზე ყიდის. ასევე მუშაობენ ღვინის საზღვარგარეთ ექსპორტირებაზე.

ღვინის დამზადების გარდა, მანანა და ფრიდონი გეგმავენ პატარა საოჯახო სასტუმროს გაფართოებას ვიზიტორებისთვის, რომლებიც აფასებენ ზემო აჭარის მთიან პეიზაჟებსა და ნატურალურ ღვინოს და ასევე ქართული სამზარეულოს ეთნოგრაფიული კუთხისა და კულინარიული მასტერკლასების მოწყობას.

„ჩვენი საბოლოო მიზანია ავაშენოთ ღვინის მცირე ქარხანა, რომელიც დაგვეხმარება 20-25 ადგილობრივის დასაქმებაში და მეტი ნატურალური ღვინის წარმოებაში“, - დასძინა მან.

აღიარებენ რა ფრიდონისა და მანანას ენთუზიაზმს და მეღვინეობით მათ გატაცებას, სურსათისა და სოფლის მეურნეობის ორგანიზაციამ (FAO) და ევროკავშირმა (EU), ENPARD-ისა და EU4Business პროგრამების ფარგლებში მხარდაჭერა აღმოუჩინეს ნური სირაბიძის ღვინის მარანს და გადასცეს თანამედროვე ღვინის ავზები, რომელიც გაზრდის სურსათის უვნებლობის ხარისხსა და უზრუნველყოფს ხარისხიანი ღვინის დაყენებას.

2022 წლიდან ნური სირაბიძის ღვინის მარანი მონაწილეობს FAO-ს აგრარულ ბაზრებში „უნიკალური ქართული გემო“, რომელიც ორგანიზებულია EU4Business ინიციატივის მხარდაჭერით.

###  

სურსათისა და სოფლის მეურნეობის ორგანიზაცია და ევროკავშირი მხარს უჭერენ მცირე, საშუალო და მსხვილი ფერმერული მეურნეობების ინიციატივებს ENPARD-ისა და EU4Business პროგრამების ფარგლებში. 2022 წლიდან პროგრამა კიდევ უფრო მნიშვნელოვან აქცენტს აკეთებს ქვეყანაში სურსათის უვნებლობის გაუმჯობესებაზე. ევროკავშირის მიერ დაფინანსებული კიდევ ერთი ინიციატივა, რომელსაც ახორციელებენ სურსათისა და სოფლის მეურნეობის ორგანიზაცია, გაეროს განვითარების პროგრამა, გაეროს ინდუსტრიული განვითარების ორგანიზაცია (UNIDO) და მიგრაციის საერთაშორისო ორგანიზაცია (IOM) მიზნად ისახავს ხელი შეუწყოს მეწარმეობას, გააუმჯობესოს საკანონმდებლო ბაზა, გაზარდოს ფინანსების ხელმისაწვდომობა და გააძლიეროს თანამშრომლობა ევროკავშირის წევრ ქვეყნებთან.